کابل کې د سیمه‌ ییزو همکاریو نوې څپه؛ د منځنۍ اسیا هېوادونو له استازو سره مهمه مشورتي ناسته ترسره شوه

کابل کې د سیمه‌ ییزو همکاریو نوې څپه؛ د منځنۍ اسیا هېوادونو له استازو سره مهمه مشورتي ناسته ترسره شوه

بریانیوز:(دوشنبه،۱۷ حمل ۱۴۰۵) 

د افغانستان پلازمېنه کابل د یکشنبې په ورځ د یوې مهمې سیمه‌ ییزې غونډې کوربه و، چې د منځنۍ اسیا هېوادونو له استازو سره د مشورتي خبرو اترو په موخه جوړه شوې وه. دا ناسته د سیمې د اړیکو د پیاوړتیا او د ګډو همکاریو د پراختیا په هدف ترسره شوه

په دې یوه ورځنۍ غونډه کې د طالبانو د حکومت د بهرنیو چارو د وزارت استازو ترڅنګ د اوزبېکستان، قرغیزستان، ترکمنستان، تاجیکستان او قزاقستان ډېپلوماټانو ګډون کړی و. د ګډونوالو ترمنځ د سیمې د سیاسي ثبات، اقتصادي همکاریو او د متقابلو اړیکو د پراخېدو پر موضوعاتو هر اړخیزې خبرې وشوې

د غونډې په جریان کې ټینګار وشو چې د افغانستان او منځنۍ اسیا هېوادونه کولای شي د ګډو اقتصادي پروژو، سوداګریزو لارو د پراختیا او ترانزیټي اسانتیاوو د ښه والي له لارې د سیمې اقتصادي انځور بدل کړي. همدارنګه د انرژۍ د لېږد، د سرحدي همکاریو او د سوداګرۍ د خنډونو د لرې کولو پر موضوع هم بحثونه وشول

د غونډې ګډونوالو څرګنده کړه چې د سیمه‌ییزو اړیکو پیاوړتیا یوازې اقتصادي ګټه نه لري، بلکې د اعتماد فضا هم رامنځته کوي او د اوږدمهاله ثبات لپاره مهم بنسټ جوړوي. دوی زیاته کړه چې د ګډو ګټو پر بنسټ همکاري کولای شي د سیمې هېوادونه له نویو فرصتونو سره مخ کړي

شنونکي وایي چې دا ډول غونډې د افغانستان لپاره د نړیوالو او سیمه‌ییزو اړیکو د پراخېدو مهم فرصت دی، او کولی شي د اقتصادي انزوا د کمولو او د ترانزیټي رول د پیاوړتیا په برخه کې اغېزمن تمام شي

دا ناسته په داسې حال کې ترسره کېږي چې سیمه د بدلونونو له نوې مرحلې سره مخ ده، او هېوادونه هڅه کوي د خبرو او ډیپلوماسۍ له لارې خپلې اړیکې لا منظمې او پیاوړې کړي، څو د ګډو ګټو پر بنسټ د ثبات او پرمختګ لاره همواره شي