کابل — مرګوني سېلابونه او توپاني بارانونه — په افغانستان کې د انساني ناورین دردونکې شمېره لوړه شوه

کابل —  مرګوني سېلابونه او توپاني بارانونه — په افغانستان کې د انساني ناورین دردونکې شمېره لوړه شوه

بریانیوز:(پنجشنبه،۲۰ حمل۱۴۰۵)

کابل — د طالبانو د طبیعي پېښو پر وړاندې د مبارزې ادارې اعلان کړی چې د روان لمریز کال د حمل له شپږمې نېټې راهیسې، په افغانستان کې د سختو بارانونو، ویجاړوونکو سېلابونو، واورو ښویېدنې او د کورونو د چتونو د نړېدو له امله، لږ تر لږه ۱۵۷ کسان خپل ژوند له لاسه ورکړی دی

د یادې ادارې د معلوماتو له مخې، په دې طبیعي ناورینونو کې ۲۲۹ کسان ټپیان شوي او ۹ نور لا هم ورک دي، چې د هغوی د موندلو هڅې روانې دي. دغه شمېرې د هېواد په بېلابېلو ولایتونو کې د طبیعت د بې‌رحمه څپو یو دردناک انځور وړاندې کوي

چارواکو ویلي چې پرله‌پسې درنې ورښتونه او ناڅاپي سېلابونه نه یوازې د خلکو ژوند اخیستی، بلکې سلګونه کورونه یې ویجاړ کړي او ګڼې کورنۍ یې بې‌کوره کړې دي. د ژغورنې ډلې په سختو شرایطو کې هڅه کوي چې پاتې کسان وژغوري او زیانمنو سیمو ته بېړنۍ مرستې ورسوي

بشري بنسټونه خبرداری ورکوي چې که بېړنۍ مرستې ژر تر ژره ونه رسېږي، نو د ناورین لمن به نوره هم پراخه شي. دوی له نړیوالې ټولنې غوښتنه کړې چې د افغان زیانمنو لاسنیوی وکړي او د بیارغونې په برخه کې بیړني ګامونه پورته کړي

کارپوهان وايي، د اقلیم بدلون، د چاپېریال خرابوالی او د بنسټیزو اسانتیاوو نشتوالی د دې لامل شوي چې طبیعي پېښې لا مرګونې او ویجاړوونکې شي. د دوی په اند، د راتلونکو ناورینونو د مخنیوي لپاره باید جدي او دوامدار اقدامات ترسره شي