مقاله

اتریش له ازبکستان سره د کډوالو د بېرته ستنولو د اسانتیا تړون لاسلیکوي

اشتراک گذاری:

بریانیوز:(پنجشنبه، ۱۰ ثور ۱۴۰۵)

وېنه — د اتریش حکومت اعلان کړی چې راتلونکې میاشت به له ازبکستان سره یو تړون لاسلیک کړي، چې موخه یې د کډوالو د بېرته ستنولو بهیر اسانه کول دي، په ځانګړې توګه د افغان وګړو د همدې هېواد له لارې افغانستان ته لېږدول

د اروپايي رسنیو د راپورونو له مخې، د اتریش د حکومت په خبرپاڼه کې ویل شوي چې د دې هېواد د کورنیو چارو او بهرنیو چارو وزیران به د مې میاشتې په اوومه نېټه ازبکستان ته سفر وکړي، څو دا تړون رسمي کړي

د چارواکو په وینا، دا تړون به د هغو کډوالو د ایستلو بهیر چټک او منظم کړي چې په اتریش کې د اوسېدو قانوني اسناد نه لري

همدارنګه، د افغان وګړو د لېږد لپاره به ازبکستان د منځګړي هېواد په توګه وکارول شي

کارپوهان وایي، دا پرېکړه په داسې حال کې کېږي چې اروپايي هېوادونه د ناقانونه کډوالۍ د مخنیوي او د کډوالو د بېرته ستنولو لپاره نوې لارې لټوي

تر اوسه د افغان لوري له خوا د دې اعلان په اړه کوم رسمي غبرګون نه دی خپور شوی، خو تمه کېږي چې دا موضوع به په سیمه‌ییزه کچه بحثونه راپاروي