په ایران کې مېشت میلیونونه افغان کډوال د جګړې د ناڅرګندو قربانیانو په توګه یاد شول

اشتراک گذاری:

بریا نیوز (سه شنبه ،۲۹ثور ۱۴۰۵)

د یان ایگلند له خوا په یوه تازه اعلامیه کې ویل شوي چې په ایران کې شاوخوا له څلورو میلیونو څخه زیات افغان کډوال د هغه جګړو «پټ او هېر شوي قربانیان» دي چې د امریکا، اسراییل او ایران ترمنځ د زیاتېدونکو کړکېچونو له امله رامنځته شوې فضا سره تړاو لري. د ناروې د کډوالو شورا مشر ویلي، دا افغان کډوال د سخت اقتصادي فشار، د لوړې بې‌وزلۍ او د ژوند د ورځنیو اړتیاوو د نه پوره کېدو له جدي ستونزو سره مخ دي. د هغه په وینا، په ایران کې د انفلاسیون زیاتوالی او د عایداتو کمېدل د دې لامل شوي چې ډېری افغان کورنۍ نور د خوړو د برابرولو او د کور د کرایې د ورکولو وس ونه لري

ایگلند په خپلو څرګندونو کې زیاته کړې چې د خوراکي توکو بیې د تېر کال په پرتله نږدې دوه برابره لوړې شوې دي، چې له امله یې زرګونه کورنۍ د لوږې او بې‌ثباته ژوند له خطر سره مخ دي. هغه ټینګار کړی چې نړیواله ټولنه باید د افغان کډوالو د وضعیت د ښه کېدو لپاره عاجل او عملي اقدامات وکړي، څو دغه لوی انساني بحران لا ژور نه شي

د ناروې د کډوالو شورا د راپور له مخې، د بېړنیو نقدي مرستو پروګرامونه هم پیل شوي، څو زرګونو کورنیو ته د خوراکي توکو او نورو لومړنیو اړتیاوو د پوره کولو لپاره مالي مرسته برابره شي. دغه مرستې به له هغو کورنیو سره مرسته وکړي چې اوس د ژوند د بقا له سختو ننګونو سره مخ دي

کارپوهان وایي، په ایران کې د افغان کډوالو وضعیت یوازې اقتصادي ستونزه نه ده، بلکې یو ژور بشري بحران دی چې د سیمه‌ییزو کړکېچونو او نړیوالو سیاسي فشارونو له امله نور هم پېچلی شوی دی

هغوی ټینګار کوي چې که دا وضعیت دوام وکړي، نو زرګونه نورې کورنۍ به هم د بې‌سرپناهۍ او لوږې له خطر سره مخ شي

بشري مرستندویه ادارې خبرداری ورکوي چې د افغان کډوالو لپاره د دوامدار ملاتړ نشتوالی کولی شي په سیمه کې د بې‌ثباتۍ کچه لوړه کړي، ځکه چې د ژوند له سختو شرایطو سره مخ خلک ډېر ژر د اقتصادي او ټولنیزو ستونزو تر فشار لاندې راځي

په نړیواله کچه د بشري حقونو فعالان وایي، د افغان کډوالو د ملاتړ لپاره باید بیړنۍ ستراتیژي جوړه شي، څو د هغوی د ژوند اساسي اړتیاوې خوندي شي او د یوې نوې انساني فاجعې مخه ونیول شي