مقاله

«د کوټې پر مسافر وړونکي اورګاډي برید وغندل شو»؛ افغانستان د ملکي وګړو مرګ‌ژوبله د خواشینۍ وړ وبلله

اشتراک گذاری:

بریا نیوز (دوشنبه ،۴جوزا، ۱۴۰۵)

افغانستان د پاکستان د بلوچستان ایالت په مرکز کوټه کې پر یوه مسافر وړونکي اورګاډي وروستی برید غندلی او د پېښې له قربانیانو سره یې خواخوږي ښودلې ده

د بهرنیو چارو وزارت ویاند په خپره شوې خبرپاڼه کې ویلي، په دغه چاودنه کې یو شمېر ملکي وګړي وژل شوي او ټپیان شوي دي

بلخي ټینګار کړی: د ملکي وګړو وژل کېدل او ټپي کېدل، که د هر لوري له خوا وي او په هر ډول ترسره کېږي، د غندنې وړ دي

د بهرنیو چارو وزارت ویلي، بې‌ګناه خلک باید د جګړو او تاوتریخوالي ښکار نه شي او د سیمې هېوادونه باید د ولسونو د خونديتوب لپاره ګډې هڅې وکړي

په خبرپاڼه کې راغلي، افغان لوري د پېښې له قربانیانو او د هغوی له کورنیو سره ژوره خواخوږي څرګنده کړې او د وژل شویو کورنیو ته یې د ډاډګیرنې او خواخوږۍ خبرې کړې دي

دغه برید داسې مهال ترسره کېږي چې د پاکستان په بلوچستان ایالت کې په وروستیو میاشتو کې د ناامنۍ پېښې زیاتې شوې دي. شنونکي وایي، د دې ډول بریدونو دوام نه یوازې د سیمې امنیت اغېزمنوي، بلکې د ولسونو ترمنځ ویره او اندېښنې هم زیاتوي

سیاسي کتونکي باور لري، د ملکي وګړو مرګ‌ژوبله د هرې شخړې تر ټولو دردناکه برخه ده او د سیمې هېوادونه باید د تاوتریخوالي د کمېدو او د ولسونو د خونديتوب لپاره جدي ګامونه پورته کړي