د افغانستان او چین ترمنځ د سوداګریزو اړیکو د پراختیا لپاره هوکړه‌لیک لاسلیک شو

اشتراک گذاری:

بریانیوز جمعه - ١۹ سرطان ١٤٠٥

د افغانستان د سوداګرۍ او پانګونې خونې او د چین د شینګداو نړیوال نندارتون مرکز ترمنځ د سوداګریزو اړیکو د پراختیا، ګډو نندارتونونو جوړولو او د ګډو غونډو د ترسره کولو په موخه د همکارۍ هوکړه‌لیک لاسلیک شو

دغه هوکړه‌لیک د تولیدي ماشینونو د نړیوال نندارتون په څنډه کې د افغانستان د سوداګرۍ او پانګونې خونې د یو شمېر مسوولانو او افغان سوداګرو په حضور کې لاسلیک شو

د هوکړه‌لیک له مخې، چینایي تولیدوونکي او سوداګر، په ځانګړي ډول د صنعتي ماشینونو جوړونکي شرکتونه، به د امام ابوحنیفه په پنځم ملي او نړیوال نندارتون کې ګډون وکړي او خپل نوي ماشینونه او صنعتي وسایل به افغان بازار ته د پېژندنې او د اقتصادي همکاریو د پراختیا لپاره نندارې ته وړاندې کړي

د سوداګرۍ خونې مسوولان وایي، دا هوکړه‌لیک به د افغانستان او چین ترمنځ د سوداګرۍ د پراختیا، د پانګونې د زیاتوالي او د صنعتي تجربو د شریکولو لپاره نوې زمینه برابره کړي

دوی زیاتوي چې د نړیوالو نندارتونونو له لارې کولی شي افغان سوداګر له نړیوالو تولیدوونکو سره وصل کړي، څو په هېواد کې د صنعت، تولید او اقتصادي ودې بهیر لا پیاوړی شي