اخبار جهان

واشنګټن پوسټ: افغانستان کې نږدې ۱۴ میلیونه کسان له سختې لوږې سره مخ دي

اشتراک گذاری:

بریانیوز/ شنبه( ۱۷ / اسد /۱۴۰۵هـ.ش)

کابل – د امریکا واشنګټن پوسټ ورځپاڼې په یوه تازه مقاله کې خبرداری ورکړی چې په افغانستان کې نږدې ۱۴ میلیونه کسان له سختې لوږې سره مخ دي او د خوړو کمښت د میلیونونو افغانانو ژوند له جدي ګواښ سره مخ کړی دی

د ورځپاڼې د راپور له مخې، د طالبانو کمزوری مدیریت، سخته وچکالي او د نړیوالو بشري مرستو کمېدل د افغانستان د روان بشري ناورین له مهمو لاملونو څخه دي

راپور زیاتوي، د ډونالډ ټرمپ د ولسمشرۍ له پیل وروسته د خوړو نړیوال پروګرام ته د امریکا مرستې نږدې نیمایي ته راکمې شوې دي. که څه هم د امریکا بهرنیو چارو وزارت دغه پروګرام ته د ۸۰۰ میلیونه ډالرو نوې مرستې اعلان کړی، خو افغانستان د دغو مرستو د ترلاسه کوونکو هېوادونو په نوملړ کې نه دی شامل شوی

د راپور له مخې، په افغانستان کې اوس مهال میلیونونه ماشومان او ښځې له خوارځواکۍ سره مخ دي او د خوړو او روغتیايي خدمتونو کمښت د هغوی وضعیت لا پسې خراب کړی دی

د مرستندویه بنسټونو په وینا، د نړیوالو مرستو دوامداره کمښت ښايي د افغانستان بشري وضعیت لا پسې خراب کړي، په ځانګړي ډول په هغو سیمو کې چې وچکالۍ او د خلکو د عایداتو کمېدو د ژوند شرایط سخت کړي دي