نصیر فایق: د تاریخي اثارو ویجاړول ویاړ نه، بلکې د یوه ملت پر هویت برید دی

نصیر فایق: د تاریخي اثارو ویجاړول ویاړ نه، بلکې د یوه ملت پر هویت برید دی

 بریانیوز جمعه ( ۶/ سنبله /۱۴۰۵هـ.ش)

 ملګرو ملتونو کې د افغانستان استازي نصیر احمد فایق وايي، د افغانستان د تاریخي اثارو او کلتوري میراثونو ویجاړول د ویاړ وړ کار نه دی، بلکې د یوه ملت د تاریخ، هویت او فرهنګي حافظې پر وړاندې جنایت ګڼل کېږي

فایق دغه څرګندونې د بامیان د پخواني طالب والي عبدالله سرحدي د وروستیو څرګندونو په غبرګون کې کړې دي. سرحدي په یوه مرکه کې د بامیان د بودا د مجسمو د ویجاړولو دفاع کړې او ویلي یې دي چې دغه اقدام د خدای غوښتنه وه

نصیر فایق د سرحدي د دغو څرګندونو په غبرګون کې ویلي، د افغانستان تاریخي او فرهنګي میراثونه یوازې د یوه حکومت یا یوې ډلې ملکیت نه دي، بلکې د ټول ملت ګډه تاریخي شتمني ده

هغه ټینګار کړی چې د تاریخي اثارو قصدي ویجاړول په دین نه شي توجیه کېدای او د افغانستان د لرغوني تاریخ د نښو له منځه وړل د یوه ملت د هویت پر وړاندې ستر زیان دی

فایق ادعا کړې چې د افغانستان د فرهنګي میراثونو ځینې ویجاړۍ د پردیو په امر ترسره شوې دي او ویلي یې دي چې د دین له نوم څخه د تاریخي اثارو د له منځه وړلو لپاره استفاده کول د منلو وړ نه دي

د بامیان د بودا سترې مجسمې د افغانستان له تر ټولو مشهورو لرغونو اثارو څخه وې چې په ۲۰۰۱ کال کې د طالبانو د واکمنۍ پر مهال ویجاړې شوې. د دغو مجسمو له ویجاړولو وروسته د افغانستان د کلتوري میراث د خوندي ساتنې موضوع د نړیوالو بنسټونو د جدي پاملرنې وړ وګرځېده

فایق وايي، د افغانستان د تاریخي ځایونو ساتنه یوازې د تېر تاریخ د خوندي کولو مسئله نه ده، بلکې د راتلونکو نسلونو د هویت او تاریخي حافظې د ژغورلو لپاره هم اړینه ده