اخبار جهان

بیجینګ : شي جین‌پینګ ته نږدې دوه لوړپوړي چینايي جنرالان له دندو ګوښه شول

اشتراک گذاری:

(بریانیوز پنجشنبه (۲/ میزان /۱۴۰۵هـ.ش

چین د پوځ دوه لوړپوړي جنرالان، ژانګ یوشیا او لیو ژنلي، د فساد او له واکمن کمونیست ګوند سره د بې‌وفایۍ په ګډون د یو شمېر تورونو له امله له خپلو دندو او ګوند څخه ایستلي دي

ژانګ یوشیا د چین د مرکزي پوځي کمېسیون مرستیال او د دغه هېواد په پوځي جوړښت کې له ولسمشر شي جین‌پینګ وروسته له تر ټولو لوړپوړو چارواکو څخه و. لیو ژنلي هم د همدې کمېسیون غړی او د چین د ګډو ځواکونو د لویې قوماندانۍ مشر و

چینايي چارواکو پر دواړو جنرالانو د فساد، له واک څخه د ناوړه ګټې اخیستنې، د ګوندي اصولو د سرغړونې او له واکمن ګوند سره د بې‌وفایۍ تورونه لګولي دي

د راپورونو له مخې، د دواړو چارواکو پر وړاندې له څو میاشتو څېړنو وروسته پرېکړه شوې او د هغوی دوسیې د نورو قانوني اقداماتو لپاره پوځي څارنوالۍ ته سپارل شوې دي

د ژانګ یوشیا لرې کېدل ځکه ځانګړی پام ځانته اړوي چې نوموړی د چین د پوځ په لوړپوړي جوړښت کې له ولسمشر شي جین‌پینګ سره نږدې اړیکې لرونکی چارواکی بلل کېده. د هغه له ګوښه کېدو سره د چین د مرکزي پوځي کمېسیون په جوړښت کې هم د پام وړ بدلون رامنځته شوی دي

چین په وروستیو کلونو کې د پوځ په دننه کې د فساد پر وړاندې پراخ اقدامات کړي او ګڼ لوړپوړي پوځي چارواکي یې له دندو لرې یا تر څېړنې لاندې راوستي دي

د دغو دوو لوړپوړو جنرالانو پر وړاندې وروستي اقدامات په داسې مهال کېږي چې د چین مشرتابه د پوځ په دننه کې د فساد د مخنیوي او د واکمن ګوند پر وړاندې د سیاسي وفادارۍ د ټینګښت هڅې زیاتې کړې دي