اروپايي ټولنه : ملګرو ملتونو او اروپايي ټولنې د افغانستان او پاکستان ترمنځ د تاوتریخوالي د کمېدو غوښتنه کړې

اروپايي ټولنه : ملګرو ملتونو او اروپايي ټولنې د افغانستان او پاکستان ترمنځ د تاوتریخوالي د کمېدو غوښتنه کړې

(بریانیوزشنبه(۱۱/ میزان /۱۴۰۵هـ.ش

ملګرو ملتونو او اروپايي ټولنې د افغانستان او پاکستان ترمنځ د روان تاوتریخوالي په تړاو د زغم، خبرو اترو او د ملکي وګړو د خوندیتوب غوښتنه کړې ده

د ملګرو ملتونو د سرمنشي ویاند سټیفن دوجاریک ویلي، د دواړو هېوادونو ترمنځ دوامدار تاوتریخوالی ملکي وګړي له جدي ګواښ سره مخ کوي. نوموړي ټینګار کړی چې د شخړې ښکېل لوري باید د تاوتریخوالي د کمولو لپاره هڅې وکړي، د اختلافونو د هواري لپاره خبرو اترو ته مخه کړي او نړیوال قوانین رعایت کړي

د ملګرو ملتونو د معلوماتو له مخې، د افغانستان او پاکستان پر پوله روان تاوتریخوالی د ملکي وګړو ژوند له خطر سره مخ کړی دی. په وروستیو بریدونو کې د کونړ او هلمند په ولایتونو کې لږ تر لږه ۱۰ ملکي وګړي وژل شوي او ۹ نور ټپیان شوي چې ډېری وژل شوي کسان ماشومان وو

اروپايي ټولنې هم د ملکي وګړو د مرګ‌ژوبلې په اړه اندېښنه ښودلې او له دواړو لورو یې د زغم او خبرو اترو غوښتنه کړې ده. دې ټولنې ټینګار کړی چې ټول لوري باید نړیوال او بشري قوانین رعایت کړي او د ملکي وګړو او ملکي تاسیساتو د خوندیتوب لپاره لازم اقدامات وکړي

د نړیوالو غوښتنې په داسې مهال مطرح کېږي چې د افغانستان او پاکستان ترمنځ وروستیو نښتو او بریدونو د ملکي وګړو د خوندیتوب او د سیمې د لا زیاتې بې‌ثباتۍ په اړه اندېښنې زیاتې کړې دي