اخبار جهان

نړيوال کډوال: قرغیزستان د افغان او افریقايي کډوالو د منلو په بدل کې اروپا ته د کارګرانو د لېږلو وړاندیز رد کړ

اشتراک گذاری:

(بریانیوز چهارشنبه (۲۲/ میزان /۱۴۰۵هـ.ش

د قرغیزستان د بهرنیو چارو وزیر جنبیک کولوبایف ویلي، چې یو شمېر اروپايي هېوادونو وړاندیز کړی، که قرغیزستان افغان او افریقايي کډوال ومني، نو په بدل کې به یې د دغه هېواد ماهر کارګرانو ته په اروپا کې د کار زمینه برابره کړي

کولوبایف ټینګار کړی، چې هېواد یې له دې وړاندیز سره موافق نه دی او چمتو نه دی چې اروپا ته د خپلو کارګرانو د لېږلو لپاره د کډوالو د منلو پر داسې شرایطو خبرې وکړي

د قرغیزستان د رسنیو د راپورونو له مخې، د دغه هېواد د بهرنیو چارو وزیر دا څرګندونې د پارلمان د نړیوالو اړیکو، دفاع، امنیت او کډوالۍ د کمېټې په غونډه کې کړې دي

د نوموړي په وینا، قرغیزستان نه غواړي د خپلو ماهرو کارګرانو د بهر ته د لېږلو موضوع د افغان او افریقايي کډوالو د منلو له مسئلې سره وتړي. دغه دریځ په داسې حال کې څرګند شوی، چې د کډوالۍ او د بهرنیو کارګرانو د ګومارنې موضوع د اروپايي هېوادونو لپاره له مهمو بحثونو څخه ده

د دې احتمالي وړاندیز په اړه د اروپايي هېوادونو نومونه، د کډوالو شمېر او د هوکړې نور شرایط په خپرو شویو معلوماتو کې نه دي روښانه شوي