اخبار جهان

سوريې د کوسوو خپلواکي رسمي وپېژندله – په رياض کې د سعودي وليعهد، د سوريې او کوسوو د مشرانو مهمه ليدنه

اشتراک گذاری:

رياض – د سوريې حکومت اعلان کړی چې هېواد یې د کوسوو جمهوريت د يو خپلواک او حاکم دولت په توګه رسمي وپېژاند. دا پرېکړه د چارشنبې په ورځ (د مې ۷مه) د سعودي عربستان په پلازمېنه رياض کې اعلان شوه

د سعودي عربستان وليعهد شهزاده محمد بن سلمان د سوريې ولسمشر احمد الشراع او د کوسوو ولسمشره وېوسا عثماني په يوه درې‌جانبه غونډه کې مېلمانه کړل، چې د سيمې او نړۍ د ډيپلوماټيکو کړيو پام يې ځان ته رااړولی

د سعودي دولتي سرچينو په وينا، وليعهد محمد بن سلمان د سوريې د پرېکړې هرکلی کړی او د ولسمشر الشراع دا ګام یې «د سولې، متقابل درناوي او د نړيوالې مشروعيت» پر لور يو تاريخي اقدام بللی

وليعهد زياته کړه

د سيمې راتلونکی د تفاهم او متقابل درناوي له لارې رامنځته کېږي، او د سوريې دا پرېکړه د همغږۍ او ګډو ارزښتونو يو زرين مثال دی

بلخوا د کوسوو ولسمشرې وېوسا عثماني د سوريې له ولس او مشرانو مننه کړې او ويلي یې دي چې دا پېښه به د دواړو هېوادونو تر منځ د سياسي او اقتصادي اړيکو نوې دروازې پرانیزي

د نړيوالو شنونکو په باور، د سوريې له لوري د کوسوو د خپلواکۍ رسمي پېژندنه نه يوازې د بلقان سيمې لپاره، بلکې د منځني ختيځ د سياسي انډول لپاره هم يو مهم پرمختګ ګڼل کېږي

د سياسي کارپوهانو په وينا، دا پرېکړه ښيي چې د سوريې د بهرنۍ پاليسۍ نوې پاڼه پرانيستل شوې ده، او دمشق غواړي د نړيوالو همکاريو او ډيپلوماسۍ له لارې خپل ځای يو ځل بيا د سيمې په سياسي ډګر کې پياوړی کړي