د طالبانو د لوړو زده‌کړو وزیر د جزايي اصول‌نامې منتقدان «کافران» وبلل

اشتراک گذاری:

د طالبانو د لوړو زده‌کړو وزیر، ندا محمد ندیم، هغه کسان چې د طالبانو د جزايي اصول‌نامې پر وړاندې نیوکې کوي، «کافران» بللي دي. یاده اصول‌نامه په دې وروستیو کې د طالبانو د مشر له لوري توشیح شوې ده.

بریا نیوز ( یکشنبه، ۱۲ دلو ۱۴۰۴)

ندا محمد ندیم دا څرګندونې د پکتیا ولایت په «عبدالله بن مبارک» مدرسه کې د یو شمېر طلبه‌وو د فراغت په مراسمو کې وکړې. نوموړي ادعا وکړه چې د طالبانو قوانین او فرمانونه د «شریعت او اسلام» پر بنسټ جوړ شوي دي.

هغه وویل: «دا قوانین داسې نه جوړېږي چې کافران پرې اعتراض وکړي. لکه څنګه چې اوس د جزا قانون تصویب شوی، بیا پرې اعتراض کېږي او وايي چې سخت قانون جوړ شوی.

دوی غواړي د خلکو په غږ پورته کولو سره قانون، شریعت او اسلام له خلکو لرې کړي.»

دا په داسې حال کې ده چې د طالبانو جزايي اصول‌نامې له پراخو غبرګونونو سره مخ شوې ده.

یو شمېر مدني فعالان، سیاسي څېرې او دیني عالمان وايي چې دغه اصول‌نامه نه یوازې د بشري حقونو له بنسټیزو اصولو سره په ټکر کې ده، بلکې ځینې مادې یې د اسلامي اصولو او د دین له اصلي لارښوونو سره هم په ښکاره ټکر کې دي.

د دوی په وینا، دغه اصول‌نامه د اسلام د طالبانو د ځانګړي او محدود تفسیر پر بنسټ جوړه شوې ده.