طالبانو په کابل کې د رییس خدایداد مرستیال «خلیلزاد» وژلی

اشتراک گذاری:

د کابل په عیدګاه جومات شاوخوا کې د عملیاتو پر مهال یو مشهور تښتوونکی ووژل شو

بریا نیوز( سه‌شنبه، ١٤ دلو ١٤٠٤)

د طالبانو د کورنیو چارو وزارت ویلي، چې د یرموک ۶۰ عملیاتي قطعې ځواکونو د کابل ښار د عیدګاه جومات په شاوخوا سیمه کې د عملیاتو پر مهال یو مشهور سړي تښتوونکی، خلیلزاد، وژلی دی.

د یاد وزارت د معلوماتو له مخې، خلیلزاد د خدایداد مرستیال بلل کېده. خدایداد د جمهوري نظام پر مهال د اختطاف او نورو جنایي جرمونو په تور اعدام شوی و.

د کورنیو چارو وزارت وایي، خلیلزاد هغه مهال ووژل شو چې د نیول کېدو پر وخت یې وسله‌وال مقاومت وکړ. د وزارت په وینا، د امنیتي ځواکونو او نوموړي ترمنځ متقابلې ډزې وشوې چې په پایله کې خلیلزاد ووژل شو.

طالبان زیاتوي، چې خلیلزاد د ګڼو اختطافونو، وژنو او نورو جنایي پېښو کې لاس درلود او له اوږدې مودې راهیسې د امنیتي ارګانونو تر تعقیب لاندې و.