د تخار په کهنه خانې مشهور ځنګل وهل شوی او پر خلکو وېشل شوی

د تخار د کهنه خانې ۲۰ زره جریبه ځنګل وهل شوی او پر خلکو وېشل شوی؛ د چاپېریالي ناورین په اړه اندېښنې

بریانیوز ( سه‌شنبه، ١٤ دلو ١٤٠٤)

د تخار ولایت د خواجه بهاوالدین، درقد او دشت‌قلعه ولسوالیو ترمنځ موقعیت لرونکی د کهنه خانې مشهور ځنګل د طالبانو د کرنې وزارت او محلي ادارو د پرېکړې له مخې وهل شوی او لرګي یې پر خلکو وېشل شوي دي. د سیمې اوسېدونکو دا اقدام د چاپېریال لپاره سخت زیانناک بللی، خو طالبانو تر اوسه په دې اړه کوم رسمي غبرګون نه دی ښودلی.

د سیمې خلکو بریانیوز ته ویلي، چې دغه ځنګل شاوخوا ۲۰ زره جریبه ځمکه نیولې وه او د طالبانو د کرنې وزارت د اداري او مالي معیین مولوي نورالدین عمیر، د تخار د کرنې ریاست د رییس او د ځمکو د ادارې د امر په اساس وهل شوی دی.

د ځایي خلکو په وینا، د ځنګل له وهلو وروسته د لاوډسپیکر له لارې اعلانونه وشول او خلکو ته وویل شول چې راشي او له سیمې لرګي یوسي. د محلي سرچینو د معلوماتو له مخې، په تېرو پنځو ورځو کې زرګونه کسان د لرګیو او بوټو د انتقال لپاره دې سیمې ته تللي دي.

سرچینې زیاتوي، چې د لرګیو د وړلو لپاره له نورو ولایتونو، په ځانګړې توګه له بدخشان څخه هم خلک ورغلي دي، چې دا چاره د بې‌نظمۍ او ګډوډۍ سبب شوې ده.

تر اوسه د طالبانو د محلي او مرکزي ادارو له‌خوا د دې موضوع په اړه کوم رسمي وضاحت نه دی ورکړل شوی، خو د سیمې د خلکو اندېښنې د چاپېریالي زیان، اقلیمي بدلون او اداري فساد په اړه ورځ تر بلې زیاتېږي.

د سیمې اوسېدونکي وایي، د ځنګل وهل به د سیمې پر اقلیم، کرنه او د خلکو پر ژوند ناوړه اغېزې ولري، او تر ټولو د اندېښنې وړ دا ده چې د دې کار امر د طالبانو د کرنې وزارت له‌خوا صادر شوی دی.

د محلي سرچینو په وینا، د طالبانو محلي اداره غواړي چې د ځنګل ځمکه وروسته خپلو اړوندو کسانو ته په اجاره ورکړي.