اسلام‌اباد کې ډیپلوماټیک خوځښتونه: د ایران او امریکا استازي په بېلابېلو اجنډاوو پاکستان ته ځي

اسلام‌اباد کې ډیپلوماټیک خوځښتونه: د ایران او امریکا استازي په بېلابېلو اجنډاوو پاکستان ته ځي

بریانیوز:( شنبه،۵ ثور۱۴۰۵)

اسلام‌اباد – په داسې حال کې چې د سیمې سیاسي فضا له ترینګلتیاوو ډکه ده، پاکستان د مهمو ډیپلوماټیکو تګ راتګونو شاهد ګرځېدلی دی. د ایران د بهرنیو چارو وزیر، سید عباس عراقچي، اسلام‌اباد ته له رسېدو وروسته، راپورونه څرګندوي چې د امریکا لوړپوړي استازي هم د سفر تابیا نیسي

د معلوماتو له مخې، د امریکا استازي سټیو وېټکوف او جېرېډ کوشنر به هم پاکستان ته ولاړ شي، څو د سیمې پر روان وضعیت او سیاسي حل‌لارو خبرې وکړي. دا سفرونه په داسې حساس وخت کې ترسره کېږي چې د ایران اټومي پروګرام او سیمه‌ ییز امنیت د نړیوالو بحثونو په سر کې ځای لري

بلخوا، د امریکا دفاع وزیر پېټ هېګسټ ویلي چې ایران ته لا هم د یوې هوکړې لپاره “پرانیستې کړکۍ” شته، څو له خپل اټومي پروګرام څخه لاس واخلي او د نړیوالو اندېښنو ته ځواب ووایي. د هغه په وینا، ډیپلوماسي لا هم غوره لاره ده، خو وخت محدود دی

خو د ایران له لوري دا اوازې په کلکه رد شوې دي. د ایران د بهرنیو چارو وزارت ویاند اسمعیل بقایي د سپینې ماڼۍ د ویاندې هغه څرګندونې رد کړې چې ګواکې په اسلام‌اباد کې به د ایران او امریکا پلاوي سره وګوري. نوموړي پر خپلې اېکس پاڼې ټینګار کړی چې ایرانی پلاوی به یوازې له پاکستاني چارواکو سره خبرې وکړي

بقایي زیاته کړې چې د دغو لیدنو اصلي موخه د جګړې د پای ته رسولو لپاره د روانو هڅو ارزونه او همغږي ده، او د ایران او امریکا ترمنځ هېڅ ډول مخامخ کتنه نه ده پلان شوې

شنونکي وایي، که څه هم د دواړو لورو رسمي دریځونه توپیر لري، خو د پاکستان په څېر هېواد کې د دې ډول ډیپلوماټیکو تګ راتګونو زیاتوالی ښيي چې نړیواله ټولنه د کړکېچ د کمولو لپاره د بدیلو لارو په لټه کې ده