اقتصاد

د افغانستان او قره‌قالپاقستان ترمنځ د اقتصادي همکاریو د پراختیا خبرې شوې

اشتراک گذاری:

بریا نیوز (شنبه،۱۹ثور ۱۴۰۵)

د عبدالسلام حنفي په مشرۍ د ریاست‌الوزراء په ارګ کې د قره‌قالپاقستان جمهوریت د پارلمان له رییس امان بای اورینبایف او مل پلاوي سره مهمه لیدنه ترسره شوې ده

د اسلامي امارت د ویاند مرستیال حمدالله فطرت پر اېکس لیکلي چې په دې کتنه کې د افغانستان او اوزبېکستان ترمنځ د سوداګرۍ، ټرانزیټ، پانګونې، کرنې، تخنیکي همکاریو او ګرځندوی د پراختیا پر لارو چارو مفصلې خبرې شوې دي

د اوزبېکستاني پلاوي په وینا، ټاکل شوې چې سبا په مزارشریف کې د افغانستان او قره‌قالپاقستان ترمنځ ګډه سوداګریزه خونه پرانیستل شي، چې موخه یې د دواړو لورو د سوداګرو ترمنځ د اقتصادي اړیکو پراخول او د پانګونې لپاره اسانتیاوې رامنځته کول دي

همداراز د قره‌قالپاقستان چارواکو اعلان کړی چې افغان سوداګرو ته به ځانګړي مالیاتي تخفیفونه او اقتصادي امتیازونه ورکړل شي، څو د سوداګرۍ کچه لوړه او دوه اړخیزې اقتصادي اړیکې پیاوړې شي

شنونکي وایي، د افغانستان او اوزبېکستان ترمنځ د اقتصادي او ټرانزیټي همکاریو پراختیا کولای شي د سیمې د سوداګرۍ، انرژۍ او نښلونکو لارو په برخه کې مهم بدلونونه رامنځته کړي، په ځانګړي ډول داسې مهال چې د منځنۍ اسیا هېوادونه له افغانستان سره د اقتصادي تعامل د پراخېدو هڅې کوي.