حکمتیار: یوازې بلوغ د واده لپاره بسنه نه کوي، فکري پخوالی هم شرط دی

د افغانستان د اسلامي ګوند مشر ښاغلی ګلبدین حکمتیار ویلي چې د ماشومانو ودونه د قرآن کریم له لارښوونو او انساني فطرت سره په ټکر کې دي.

بریانیوز- چهارشنبه، ٢٠ جوزا ١٤٠٥

د افغانستان د اسلامي ګوند مشر ښاغلی ګلبدین حکمتیار په یوه تازه لیکنه کې ویلي چې د ماشومانو ودونه د انساني فطرت او د قرآن کریم له لارښوونو سره سمون نه لري. نوموړي همدارنګه ټینګار کړی چې مور او پلار حق نه لري خپل اولادونه په زور او د هغوی له رضایت پرته واده ته اړ کړي.

ښاغلی حکمتیار په خپله مقاله کې چې «ایا د نابالغې نجلۍ نکاح جواز لري؟» ویلي چې نکاح د ښځې او سړي ترمنځ یو مهم دیني او ټولنیز تړون دی او موخه یې د سالمې کورنۍ جوړول، د اولادونو سالمه روزنه او د ټولنې سلامت ساتل دي، نه یوازې د جنسي غریزې پوره کول.

نوموړي زیاته کړې چې د واده لپاره یوازې بیولوژیکي بلوغ بسنه نه کوي، بلکې فکري پخوالی او د ګډ ژوند د سم مدیریت وړتیا هم اساسي شرطونه دي. د هغه په وینا، قرآن کریم د بلوغ ترڅنګ پر «رشد» هم ټینګار کوي او له دې شرط پرته واده د قرآني معیارونو سره سمون نه لري.

ښاغلی حکمتیار د خپلې مقالې په یوه برخه کې اجباري ودونه د اخلاقي فساد لامل بللي او ویلي یې دي چې مور او پلار باید خپل نظرونه او غوښتنې پر اولادونو ونه تپي.

هغه د کم عمره نجونو د ودونو په اړه ځینې مشهور روایتونه او دودیز تفسیرونه هم تر پوښتنې لاندې راوستي او ادعا یې کړې چې دا ډول برداشتونه د قرآن کریم له آیتونو، عقل او انساني فطرت سره همغږي نه دي.

دا مقاله په داسې حال کې خپره شوې چې د طالبانو د «د زوجینو د تفریق اصولنامې» په اړه بحثونه او نیوکې زیاتې شوې دي. دغه سند چې د طالبانو د مشر هبت‌الله اخندزاده له خوا توشیح شوی، په یوه جنجالي برخه کې د «نکاح صغار» تر عنوان لاندې د ماشومانو ودونه په رسمیت پېژني. دا موضوع د بشري حقونو د بنسټونو او نړیوالو سازمانونو له پراخو نیوکو سره مخ شوې ده.

ښاغلي حکمتیار د خپلې لیکنې په بله برخه کې ویلي چې هېڅوک، د پخواني مېړه په ګډون او نه هم د کورنۍ غړي، حق نه لري چې کونډې او یا طلاق شوی ښځې د بیا واده کولو څخه منع کړي. د هغه په وینا، اسلام د کونډو او طلاق شوو ښځو اولیاوو ته لارښوونه کوي چې هغوی د خپلې خوښې له سړي سره له واده کولو څخه ونه ګرځوي.

هغه همدارنګه ټینګار کړی چې د ښځو خپلوان باید پر هغوی فشار او ځورونه ونه کړي او خپلې غوښتنې پرې تحمیل نه کړي.