د کندهار اوسېدونکي: په شخصي لباس کې د وسله‌والو ګرځېدل ستونزې زیاتې کړې دي

اشتراک گذاری:

بریانیوز جمعه - ١۹ سرطان ١٤٠٥

د کندهار ښار یو شمېر اوسېدونکي وایي، په شخصي لباس کې د طالبانو د سرتېرو ګرځېدل او د ورته وسله‌والو کسانو زیات حضور د دې لامل شوی چې عام خلک د طالبانو د نظامي کسانو او نورو نامسووله وسله‌والو ترمنځ توپیر په اسانۍ ونه شي کړای

د کندهار ځینو اوسېدونکو رسنیو ته ویلي، په دې وروستیو کې په ښار کې داسې وسله‌وال کسان ډېر لیدل کېږي چې رسمي نظامي یونیفورم نه لري او د پلتڼځایونو جوړېدو ته ورته حالتونه هم زیات شوي دي

دوی اندېښنه ښودلې چې د وسله‌والو کسانو د پېژندنې نشتوالی د خلکو لپاره ستونزې رامنځته کوي او ښايي د امنیتي پېښو پر مهال د عامو خلکو اندېښنې زیاتې کړي

د کندهار اوسېدونکي له اړوندو مسوولینو غواړي چې د وسله‌والو کسانو د تګ راتګ لپاره روښانه اصول جوړ کړي، څو خلک وکولای شي د قانوني امنیتي ځواکونو او نورو وسله‌والو ترمنځ توپیر وکړي

تر اوسه د طالبانو اړوندو ادارو د دغو اندېښنو په اړه رسمي څرګندونې نه دي کړي