مقاله

د امریکا عدلیې وزارت: ظاهر قدیر امریکا ته سپارل شوی او د مخدره توکو د قاچاق په تور به محاکمه شي

اشتراک گذاری:

بریانیوز شنبه - ۲۰ سرطان ١٤٠٥

واشنګټن – د امریکا عدلیې وزارت په یوه خبرپاڼه کې ویلي چې د افغانستان د ولسي جرګې پخوانی لومړی مرستیال، ظاهر قدیر، چې مخکې د کینیا په پلازمېنه نایروبي کې د مخدره توکو د قاچاق او د وسلو اړوندو جرمونو په تور نیول شوی و، امریکا ته سپارل شوی دی

د وزارت د خبرپاڼې له مخې، ظاهر قدیر د جمعې په ورځ د نیویارک یوې فدرالي محکمې ته حاضر کړای شو، چېرې چې قاضي پرېکړه وکړه نوموړی به د قضیې د څېړنې او محاکمې تر بشپړېدو پورې په توقیف کې پاتې شي

د امریکا عدلیې وزارت ویلي، که ظاهر قدیر د امریکا خاورې ته د مخدره توکو د واردولو په تور مجرم وپېژندل شي، لږ تر لږه به له لسو کلونو بند سزا سره مخامخ شي. دغه وزارت ټینګار کړی چې د نوموړي پر وړاندې قضایي بهیر به د امریکا د نافذه قوانینو له مخې پر مخ وړل کېږي

تر اوسه د ظاهر قدیر د مدافع وکیل یا د هغه د کورنۍ له لوري د یادو تورونو په اړه رسمي غبرګون نه دی خپور شوی

دا قضیه په داسې حال کې مطرح کېږي چې د مخدره توکو نړیوال قاچاق او ورسره تړلي جرمونه د امریکا د عدلي او امنیتي ادارو له مهمو لومړیتوبونو څخه ګڼل کېږي او واشنګټن ټینګار کوي چې د دغو جرمونو د عاملینو پر وړاندې به قانوني اقدامات په جدي ډول تعقیب کړي