سیاست

ټرمپ: امریکا او ایران د مذاکراتو پر بیا پیل هوکړه کړې؛ واشنګټن پر تهران نوي بندیزونه ولګول

اشتراک گذاری:

بریانیوز شنبه - ۲۰ سرطان ١٤٠٥

واشنګټن – د امریکا ولسمشر ډونلډ ټرمپ وایي، امریکا او ایران د دواړو هېوادونو ترمنځ د مذاکراتو د بیا پیل پر سر هوکړې ته رسېدلي، خو ټینګار یې کړی چې د دواړو لورو ترمنځ د اوربند موده پای ته رسېدلې ده

ټرمپ د خبرو د احتمالي بیا پیل هرکلی کړی، خو د اوربند د پای ته رسېدو یادونه یې په داسې وخت کې کړې چې د واشنګټن او تهران ترمنځ سیاسي او امنیتي ترینګلتیا لا هم پر خپل ځای پاتې ده

بل لور ته، د امریکا د خزانې وزارت اعلان کړی چې د هرمز تنګي په سیمه کې پر سوداګریزو بېړیو د بریدونو په غبرګون کې یې پر یو شمېر ایراني چارواکو، شرکتونو او مالي بنسټونو تازه بندیزونه لګولي دي

د یاد وزارت په وینا، دغه بندیزونه د هغو اشخاصو او ادارو پر ضد وضع شوي چې د ایران له پوځي او مالي فعالیتونو سره تړاو لري او د نړیوالې سوداګرۍ او سمندري امنیت د ګواښولو په تور تورن دي

د امریکا او ایران ترمنځ د خبرو د بیا پیل احتمال، له نویو اقتصادي بندیزونو سره یوځای، ښيي چې دواړه هېوادونه لا هم د ډیپلوماسۍ او فشار سیاست په موازي ډول مخ ته وړي، په داسې حال کې چې نړیواله ټولنه د سیمې د امنیتي وضعیت پرمختګونه له نږدې څاري