د پوهنې وزارت انتقال که د ښوونیز نظام د ختمېدو پیل؟

اشتراک گذاری:

د سرچینو د معلوماتو له مخې، د طالبانو مشر ملا هبت‌الله اخوندزاده په امر د پوهنې وزارت د کابل د سید جمال‌الدین افغان دارالمعلمین ودانۍ ته د لېږد بهیر پیل شوی دی.

بریانیوز- شنبه ٢٠ سرطان ١٤٠٥

سرچینې بریانیوز ته ویلي چې د دې پرېکړې موخه یوازې د ودانۍ بدلول نه دي، بلکې په راتلونکو پړاوونو کې د پوهنې وزارت د اداري جوړښت محدودول او په تدریجي ډول یې د یوه ریاست یا کوچنۍ ادارې په کچه راټیټول دي، ترڅو د دې وزارت تشکیلات د پام وړ کم شي.

د سرچینې په وینا، طالبان هڅه کوي د دې انتقال لپاره داسې انګېرنه رامنځته کړي چې ګواکې د پوهنې وزارت پر اوسنۍ ودانۍ د یوه شخص د ملکیت دعوه ثابته شوې او هغه په محکمه کې بریالی شوی، څو د وزارت د انتقال اصلي لامل پټ وساتل شي.

یوه مسلکي سرچینه، چې د پوهنې وزارت له دننه معلومات لري، وایي د طالبانو ستر هدف یوازې د وزارت د ودانۍ انتقال نه، بلکې د ښوونیز نظام تدریجي بدلون دی. د هغې په خبره، طالبان غواړي په اوږدمهال کې د پوهنې وزارت خپلواک رول له منځه یوسي، ښوونځي له مدرسو سره مدغم کړي او داسې تعلیمي نظام رامنځته کړي چې په هغه کې تدریس یوازې د طالبانو د مذهبي تفسیر او روایت پر بنسټ ترسره شي.