د افغانستان او ترکیې ترمنځ د سوداګرۍ او پانګونې د پراختیا لپاره نوي هوکړه‌لیکونه لاسلیک شول

د افغانستان او ترکیې ترمنځ د سوداګرۍ او پانګونې د پراختیا لپاره نوي هوکړه‌لیکونه لاسلیک شول

بریانیوز - جمعه، ۲ اسد ١٤٠٥

د بلخ ولایت د سوداګرۍ او پانګونې خونې د مشر په مشرۍ د ۳۳ افغان سوداګرو او پانګوالو یوه پلاوي شاوخوا دوه اوونۍ وړاندې ترکیې ته سفر کړی، چې موخه یې د افغانستان او ترکیې ترمنځ د سوداګریزو او پانګیزو اړیکو پراخول او د ګډو اقتصادي همکاریو لپاره د نویو فرصتونو رامنځته کول دي

د دغه سفر په ترڅ کې افغان او ترکي سوداګرو او پانګوالو څو ګډې غونډې، سوداګریزې ناستې او د سوداګرۍ د پراختیا فورمونه ترسره کړل. په دغو غونډو کې د دواړو هېوادونو د خصوصي سکټور استازو د سوداګرۍ، پانګونې، تولید، صادراتو او د ګډو اقتصادي پروژو په اړه خبرې وکړې

د بلخ د سوداګرۍ او پانګونې خونې مسؤلینو ویلي، د دې سفر یوه مهمه لاسته راوړنه د دواړو هېوادونو د خصوصي سکټور ترمنځ د همکارۍ د پراختیا لپاره د څو هوکړه‌لیکونو لاسلیک کېدل دي. د دوی په وینا، دغه هوکړه‌لیکونه به د سوداګریزو اړیکو د پراختیا، د پانګونې د زیاتوالي او د افغانستان د تولیداتو لپاره د ترکیې بازارونو ته د لاسرسي په برخه کې مهم رول ولوبوي

د افغان پلاوي غړو همداراز له یو شمېر ترکي فابریکو، صنعتي پارکونو او سوداګریزو مرکزونو څخه لیدنې وکړې او د تولید، بسته‌بندۍ، صادراتو او صنعتي پرمختګ په برخو کې یې د همکاریو پر فرصتونو خبرې وکړې

سوداګر باور لري چې د افغانستان او ترکیې ترمنځ د اقتصادي اړیکو پیاوړتیا نه یوازې د سوداګرۍ د کچې په لوړولو کې مرسته کوي، بلکې د پانګونې د جلب، د کارموندنې د فرصتونو د زیاتوالي او د دواړو هېوادونو د خصوصي سکټور د اړیکو په ټینګښت کې هم اغېزمنه تمامېدای شي

ترکیه د افغانستان له مهمو سوداګریزو شریکانو څخه شمېرل کېږي او په وروستیو کلونو کې د دواړو هېوادونو ترمنځ د سوداګرۍ او پانګونې د پراختیا لپاره ګڼې هڅې شوې دي. د اقتصادي چارو کارپوهان وایي، که د دواړو هېوادونو ترمنځ سوداګریزې اسانتیاوې، بانکي همکارۍ او د لېږد رالېږد لارې لا پیاوړې شي، نو د سوداګرۍ حجم به نور هم زیات شي او د ګډو پانګونو لپاره به مناسب فرصتونه رامنځته شي