د امریکا فدرالي محکمې د افغان کډوالو په ګټه پرېکړه وکړه؛ د ټرمپ د سفر بندیز د کورنیو د یوځای کېدو مخه نه شي نیولای

د امریکا فدرالي محکمې د افغان کډوالو په ګټه پرېکړه وکړه؛ د ټرمپ د سفر بندیز د کورنیو د یوځای کېدو مخه نه شي نیولای

 بریانیوز/ پنجشنبه ( ۸ / اسد /۱۴۰۵هـ.ش)

د امریکا یوې فدرالي محکمې پرېکړه کړې چې د ډونالډ ټرمپ حکومت نه شي کولی د سفر بندیز د هغو افغان کډوالو د مېرمنو او ماشومانو د امریکا د ننوتلو د مخنیوي لپاره وکاروي چې پخوا یې په دغه هېواد کې پناه ترلاسه کړې ده

د محکمې د حکم له مخې، فدرالي قاضي انتوني جي. ترېنګا د امریکا د بهرنیو چارو وزارت هغه تګلاره د قانون خلاف بللې چې د سفر بندیز په پلمه یې د افغان پناه‌اخیستونکو د کورنیو د سفر اسناد ځنډول یا ردول

دا قضیه د اوو افغانانو له خوا محکمې ته وړل شوې وه. دغو کسانو په ۲۰۲۱ کال کې د کابل له سقوط وروسته په امریکا کې پناه ترلاسه کړې وه او وروسته یې د خپلې مېرمنې او ماشومانو د امریکا ته د لېږد لپاره د کورنۍ د یوځای کېدو غوښتنلیکونه سپارلي وو

سره له دې چې د امریکا د تابعیت او کډوالۍ ادارې د هغوی غوښتنې منلې وې، خو د بهرنیو چارو وزارت د سفر بندیز په استناد د سفر اسناد نه صادرول

قاضي ټینګار کړی چې د ولسمشرۍ فرمانونه هغه کسان چې په امریکا کې یې پناه ترلاسه کړې، د سفر له محدودیتونو مستثنا ګڼي او دغه بندیز باید د دوی د کورنیو د قانوني یوځای کېدو خنډ نه شي

د محکمې د حکم له مخې، د امریکا حکومت باید د ۱۵ ورځو په موده کې د پنځو کسانو د سفر اسناد صادر کړي او د دوو نورو دوسیو ارزونه هم له سره، د سفر بندیز له پلي کولو پرته، ترسره کړي

محکمې همدارنګه ویلي چې د بهرنیو چارو وزارت دا تګلاره له اداري اصولو او نافذو قوانینو سره په ټکر کې ده او تر هغه به د حکم د پلي کېدو څارنه کوي چې د شکایت کوونکو د کورنیو غړي امریکا ته رسېدلي نه وي

د کډوالو د ملاتړ یوې نړیوالې ادارې د دې پرېکړې هرکلی کړی او ویلي یې دي چې دا حکم به د هغو افغان کورنیو لپاره د بیا یوځای کېدو لاره هواره کړي چې لا هم له امنیتي ګواښونو سره مخ دي

خو محکمې روښانه کړې چې دا پرېکړه د ټرمپ د سفر بندیز په بشپړ ډول نه لغوه کوي، بلکې یوازې د هغو افغان پناه‌اخیستونکو مېرمنې او ماشومان رانغاړي چې پناه یې منل شوې او د کورنۍ د یوځای کېدو غوښتنلیکونه یې هم تصویب شوي دي