لندن : بریتانیا کې د اوبو سپما غوښتنه؛ مسلمانانو او اسیایي ټولنو ته ځانګړې سپارښتنې نیوکې راپارولي

لندن : بریتانیا کې د اوبو سپما غوښتنه؛ مسلمانانو او اسیایي ټولنو ته ځانګړې سپارښتنې نیوکې راپارولي

 بریانیوز سه شنبه ( ۳/ سنبله /۱۴۰۵هـ.ش)

  د بریتانیا د اوبو د تنظیم ادارې «اف واټ» له مسلمانانو او اسیایي ټولنو غوښتي چې د وچکالۍ او د اوبو د کمښت د مخنیوي لپاره په خپلو ورځنیو چارو کې د اوبو مصرف راکم کړي

دغې ادارې مسلمانانو ته سپارښتنه کړې چې د اوداسه پر مهال دې له ډېرو اوبو له کارولو ډډه وکړي او ویلي یې دي چې شاوخوا یو لیټر اوبه د یوه اودس لپاره بسنه کولی شي. دغه اداره همداراز له خلکو غوښتي چې د اوداسه پر مهال د اوبو نل په دوامداره توګه خلاص پرې نه ږدي

په ورته وخت کې، د اوبو د تنظیم ادارې له بریتانیا مېشتو اسیایي ټولنو هم غوښتي چې د وریجو د مینځلو پر مهال د اوبو مصرف کم کړي، څو د اوبو د کمښت پر وړاندې د سپما په هڅو کې ونډه واخلي

خو د دغو سپارښتنو له خپرېدو وروسته د ځینو ټولنو غبرګونونه هم راپارېدلي دي. منتقدین وايي، حکومت باید د اوبو د مدیریت او د زېرمو د پیاوړتیا لپاره بنسټیز اقدامات وکړي او د خلکو په دیني او شخصي چارو کې د مداخلې پر ځای د اوبو د شبکې د پراختیا لپاره کار وکړي

یو شمېر مسلمانانو ویلي چې اودس د دوی د دیني عبادت یوه مهمه برخه ده او حکومت باید د داسې سپارښتنو پر مهال د دیني چارو حساسیتونه په پام کې ونیسي

د اوبو د کمښت موضوع په داسې حال کې د بریتانیا د عامه بحثونو برخه ګرځېدلې چې د وچکالۍ او د اوبو د سرچینو د فشار له امله چارواکي له خلکو غواړي چې د ورځني ژوند په بېلابېلو برخو کې د اوبو مصرف راکم کړي

د منتقدینو په باور، د اوبو سپما د ټولو وګړو ګډ مسوولیت دی او د دې لپاره باید سپارښتنې د خلکو د دین، توکم او ټولنیز شالید پر بنسټ ځانګړې نه شي، بلکې ټول خلک باید په مساوي ډول د اوبو د سپما هڅو ته وهڅول شي