مانیلا : فیلیپین کې له افغانستانه په تلک ډبرو کې د میلیونونو ډالرو په ارزښت شابو نیول شوی

مانیلا : فیلیپین کې له افغانستانه په تلک ډبرو کې د میلیونونو ډالرو په ارزښت شابو نیول شوی

 بریانیوز سه شنبه ( ۳/ سنبله /۱۴۰۵هـ.ش)

  د فیلیپین چارواکو د افغانستان له یوه بار څخه شاوخوا ۴۳ کیلوګرامه شکمن شابو نیولی چې د تلک ډبرو په نوم بار کې په پټه ځای پر ځای شوی و. د چارواکو په وینا، د نیول شویو نشه‌یي توکو ارزښت شاوخوا ۲۹۲،۴ میلیونه فیلیپیني پېسو اټکل شوی دی

د فیلیپین د ګمرک ادارې او د نشه‌یي توکو پر وړاندې د مبارزې ادارې ویلي، دغه بار د مانیلا په نړیوال کانتینري بندر کې تر څېړنې لاندې ونیول شو. بار په دوو شل‌فوټه کانتینرونو کې لېږدول شوی و او په اسنادو کې د «تلک ډبرو» په نوم ثبت شوی و

چارواکو ویلي، شکمن شابو په ټوکرینو کڅوړو کې پټ شوی و او کڅوړې داسې پوښل شوې وې چې د تلک له ډبرو سره ورته ښکاره شي. د لابراتوار له ازموینو وروسته د نیول شویو موادو د شابو په توګه تایید شوی دی

د فیلیپین د ګمرک چارواکو په وینا، دغه بار له افغانستان څخه لېږدول شوی و او د لوړ خطر لرونکو بارونو د څارنې او ارزونې پر مهال پرې شک وشو. له همدې امله یې سل سلنه فزیکي پلټنه ترسره شوه او نشه‌یي توکي پکې وموندل شول

دا په روان کال کې د افغانستان له تړاو لرونکي بار څخه د نشه‌یي توکو دویمه ورته پېښه بلل شوې ده. چارواکو تر دې مخکې د فبرورۍ په میاشت کې هم په مانیلا بندر کې له افغانستان سره تړلی یو بار نیولی و چې د مرمرو په نوم ثبت شوی و او شاوخوا ۴۰ کیلوګرامه نشه‌یي توکي پکې موندل شوي وو

د فیلیپین چارواکي وايي، د لوړ خطر لرونکو بارونو دوامداره څارنه، د استخباراتي معلوماتو کارول او د قاچاق د تکراري لارو پېژندل د نشه‌یي توکو د مخنیوي په برخه کې مهم رول لري

تر اوسه چارواکو نه دي ویلي چې د دغه بار د لېږد تر شا کوم کسان یا ډله ده، او د پېښې په تړاو څېړنې روانې دي