تکنولوژی

بل ګیټس: هېڅ هېواد د مصنوعي ځیرکتیا له راتلونکو بدلونونو سره چمتو نه دی

اشتراک گذاری:

(بریانیوز دوشنبه (۳۰/ سنبله /۱۴۰۵هـ.ش

د مایکروسافټ بنسټګر بل ګیټس وايي، هېڅ هېواد لا تر اوسه د مصنوعي ځیرکتیا له امله په نړۍ کې د رامنځته کېدونکو پراخو بدلونونو لپاره بشپړ چمتو نه دی او ډېری هېوادونه په دې برخه کې له اړتیا څخه ډېر وروسته پاتې دي

ګیټس پر هېوادونو غږ کړی چې د مصنوعي ځیرکتیا چټک پرمختګ ته جدي پاملرنه وکړي او د دې ټکنالوژۍ د پراخېدو لپاره له وړاندې لازم چمتووالی ونیسي

هغه ټینګار کړی چې مصنوعي ځیرکتیا به د اقتصاد، زده‌کړو، روغتیا، کارموندنې او د ټولنې د ژوند پر بېلابېلو برخو د پام وړ اغېز وکړي

د مایکروسافټ بنسټګر ویلي، هېوادونه باید د مصنوعي ځیرکتیا له بدلونونو سره د سمون لپاره خپلې روزنیزې او تخنیکي وړتیاوې پیاوړې کړي او د دې ټکنالوژۍ له فرصتونو څخه د ګټې اخیستو ترڅنګ د احتمالي ستونزو لپاره هم چمتووالی ولري

نوموړي له حکومتونو غوښتي چې د مصنوعي ځیرکتیا د چټک پرمختګ پر وړاندې یوازې ننداره کوونکي پاتې نه شي، بلکې د راتلونکو بدلونونو لپاره عملي پلانونه جوړ کړي