کابل : آریانا افغان هوايي شرکت د سوداګریزو توکو لېږد لپاره کارګو الوتکه فعاله کړه

اشتراک گذاری:

(بریانیوز دوشنبه (۳۰/ سنبله /۱۴۰۵هـ.ش

د آریانا افغان هوايي شرکت یوه کارګو بوینګ ۷۳۷-۳۰۰ الوتکه د دوشنبې په ورځ د کابل نړیوال هوايي ډګر ته ورسېده، چې د سوداګریزو توکو د هوايي لېږد لپاره به ترې ګټه واخیستل شي

د دغه شرکت په وینا، الوتکه د نړیوالو هوايي لارو له لارې د سوداګریزو توکو د لېږد لپاره ځانګړې شوې او په هره الوتنه کې د شاوخوا ۱۷ ټنه بار د انتقال وړتیا لري

آریانا افغان هوايي شرکت د یادې الوتکې د کارونې په موخه له متحده عربي اماراتو مېشت «ایر چارتر اکسپرس» شرکت سره د یوه کال لپاره تړون لاسلیک کړی دی

د آریانا افغان هوايي شرکت رییس بخت‌الرحمن شرافت ویلي، د کارګو الوتکې په فعالېدو سره به د هوا له لارې د بار لېږد خدمتونه پراخ شي او د هېواد د صادراتو د زیاتوالي لپاره به اسانتیاوې رامنځته شي

هغه زیاته کړې، د دغو خدمتونو له پراخېدو سره به افغان سوداګر وکولای شي خپل تولیدات په لنډ وخت او مناسب لګښت بهرنیو بازارونو ته ولېږدوي

د شرکت په وینا، د کارګو الوتنو پراختیا به افغان سوداګرو ته د هوايي لېږد نوې زمینه برابره کړي او له نړیوالو بازارونو سره به د افغانستان د سوداګریزو اړیکو په پیاوړتیا کې مرسته وکړي