هندوستان : د ۵.۷ میلیارد ډالرو په ارزښت اته پرمختللې جنګي بیړۍ جوړوي

هندوستان : د ۵.۷ میلیارد ډالرو په ارزښت اته پرمختللې جنګي بیړۍ جوړوي

(بریانیوزپنجشنبه (۱۴/ عـقـرب/۱۴۰۵هـ.ش

هند د خپل سمندري ځواک د پیاوړتیا لپاره له دوو کورنیو بېړۍ جوړوونکو شرکتونو سره د ۵.۷ میلیارد ډالرو په ارزښت د اتو نوې نسل جنګي بېړیو د جوړولو تړونونه لاسلیک کړي دي

د هند د دفاع وزارت د معلوماتو له مخې، دغه تړونونه د نومبر په دویمه د ګارډن ریچ شپ‌بلډرز او ګوا شپ‌یارډ  شرکتونو سره لاسلیک شوي دي. د تړون له مخې، پنځه جنګي بېړۍ به لومړی شرکت او درې نورې به دویم شرکت جوړوي. دا بېړۍ به د هند د سمندري ځواکونو لپاره طرحه او په کور دننه تولید شي

د نویو جنګي بېړیو وزن به نږدې ۴ زره او ۹۵۰ ټنو ته رسېږي او اوږدوالی به یې شاوخوا ۱۲۷ متره وي. دغه بېړۍ به په پرمختللو راداري، څارنیزو او دفاعي سیستمونو سمبالې وي او د هوا، سمندر پر مخ او د اوبو لاندې د پوځي عملیاتو وړتیا به ولري

د دغو بېړیو په وسلو کې د بېړیو ضد توغندي، له هوايي بریدونو سره د مقابلې توغندیز سیستمونه او د اوبتلونو د هدف ګرځولو لپاره تورپیډوګانې شاملې دي. همداراز، د پرمختللو حساسو تجهیزاتو او چټک حرکت وړتیا به یې د سمندري عملیاتو پر مهال اغېزمنتیا زیاته کړي

د راپورونو له مخې، د لومړنیو بېړیو سپارل به تر ۲۰۳۰ کال پورې پیل شي او د ټولو اتو بېړیو د جوړولو بهیر به په راتلونکو کلونو کې بشپړ شي

هند په پام کې لري چې تر ۲۰۳۵ کال پورې د خپل سمندري ځواک شمېر له ۲۰۰ څخه زیاتو جنګي بېړیو او اوبتلونو ته ورسوي. دا پروګرام د دغه هېواد د سمندري ځواک د پراختیا او د کورني دفاعي صنعت د پیاوړتیا د پراخې تګلارې یوه برخه ده 

د هند دفاعي چارواکي وايي، د نویو بېړیو په جوړولو سره به د دغه هېواد سمندري ځواک د سوداګریزو لارو د ساتنې، د ساحلي سیمو د دفاع او د اوبتلونو پر وړاندې د عملیاتو په برخه کې پیاوړی شي