اخبار جهان

اسلام آباد: برېټانیا هم د پاکستان له دریځ سره همغږې شوه؛ ټي‌ټي‌پي یې د سیمې امنیت ته ګواښ وبلله

اشتراک گذاری:

(بریانیوزپنجشنبه (۱۴/ عـقـرب/۱۴۰۵هـ.ش

د برېټانیا او پاکستان لوړپوړو پلاویو په اسلام‌اباد کې د افغانستان پر وضعیت او د سیمې پر امنیت خبرې کړې دي؛ په دې ناسته کې برېټانوي لوري هم د پاکستان له هغه دریځ سره موافقه ښودلې چې له مخې یې تحریک طالبان پاکستان (ټي‌ټي‌پي) نه یوازې د پاکستان، بلکې د ټولې سیمې امنیت ته ګواښ ګڼل کېږي

د ورکړل شویو معلوماتو له مخې، د دواړو هېوادونو استازو د افغانستان اړوند مسایلو، د سیمې د امنیتي وضعیت او د ټي‌ټي‌پي د فعالیتونو په اړه خپل نظرونه سره شریک کړي دي. د پاکستان لوري هڅه کړې چې د دغه تحریک فعالیتونه د سیمې د امنیت لپاره د یوې ګډې اندېښنې په توګه مطرح کړي او د برېټانیا ملاتړ هم ترلاسه کړي

د برېټانوي لوري له خوا د پاکستان له دې دریځ سره همغږي په داسې وخت کې څرګندېږي چې اسلام‌اباد په وروستیو کلونو کې په وار وار پر کابل تور پورې کړی چې د پاکستان ضد وسله‌والو ډلو ته یې په خپله خاوره کې د فعالیت زمینه برابره کړې ده؛ خو افغان حکومت دغه تورونه رد کړي او ټینګار یې کړی چې د افغانستان خاوره د نورو هېوادونو پر ضد نه کارول کېږي