د ملګرو ملتونو : ځانګړې استازې راستنو شویو افغان ښځو ته د روغتیايي خدمتونو د پراختیا ژمنه کړې

اشتراک گذاری:

(بریانیوزچهار شنبه (۱۳/ عـقـرب/۱۴۰۵هـ.ش

د ملګرو ملتونو د سرمنشي ځانګړې استازې او په افغانستان کې د دې سازمان د مرستندویه پلاوي (یوناما) مشرې رباب فاطمې ژمنه کړې چې افغانستان ته راستنېدونکو ښځو او نجونو ته به د حیاتي روغتیايي خدمتونو، رواني ملاتړ او ټولنیزو مرستو د پراختیا په برخه کې ملاتړ ته دوام ورکړي

د ملګرو ملتونو د نفوس صندوق په افغانستان کې ویلي، رباب فاطمې دا ژمنه د تورخم په عمري کمپ کې د ولادي بیړنیو خدمتونو له یوه روغتیايي مرکز څخه د لیدنې پر مهال کړې ده

د سرچینې په وینا، نوموړې په دغه مرکز کې د میندو د روغتیايي خدمتونو د وړاندې کولو بهیر له نږدې لیدلی او د ملګرو ملتونو د نفوس صندوق د فعالیتونو او هڅو یې ستاینه کړې ده

د یاد صندوق د معلوماتو له مخې، د مرستو په دغو پروګرامونو کې د راستنېدونکو ښځو او تنکیو نجونو لپاره د میندو روغتیايي خدمتونه، رواني ملاتړ او ټولنیزې مرستې شاملې دي؛ هغه خدمتونه چې د افغانستان ته د راستنېدو پر مهال د ښځو او نجونو د اړتیاوو په پوره کولو کې مهم بلل کېږي