اخبار جهان

انقره: د سعودي، ترکیې او پاکستان د ګډ دفاعي تړون په اړه د ترکیې پارلماني بحث ځنډېدلی

اشتراک گذاری:

(بریانیوزپنجشنبه (۱۴/ عـقـرب/۱۴۰۵هـ.ش

د سعودي عربستان، ترکیې او پاکستان ترمنځ د درې‌اړخیز ګډ دفاعي تړون د تصویب په اړه د ترکیې په پارلمان کې بحثونه له نیوکو او مخالفتونو سره مخ شوي او د وروستیو راپورونو له مخې، د دې تړون په اړه د پارلماني بهیر د دوام او پرېکړې موضوع ځنډېدلې ده د ترکیې یو شمېر پارلماني استازو د دغه تړون پر ځینو مادو نیوکه کړې او خبرداری یې ورکړی چې ترکیه باید له روښانه حدودو پرته نوې پوځي ژمنې ونه مني او د نورو هېوادونو په شخړو کې ښکېله نه شي

د مخالفو استازو اندېښنه دا ده چې د تړون له مخې د یوه غړي هېواد پر وړاندې وسله‌وال برید د ټولو غړو پر وړاندې برید ګڼل کېږي؛ خو د ترکیې د احتمالي پوځي مرستو، د سرتېرو د لېږلو او د جګړو پر مهال د دغه هېواد د مکلفیتونو حدود لا هم د بحث وړ دي

د دغو استازو په وینا، د ترکیې وسله‌وال ځواکونه باید د نورو هېوادونو په جګړو او سیاسي کړکېچونو کې ښکېل نه شي او انقره باید تر هغه وخته د داسې پوځي ژمنو منلو ته زړه ښه نه کړي، څو د تړون ټول اړخونه او احتمالي پایلې په روښانه توګه مشخصې شوې نه وي

د سعودي عربستان، ترکیې او پاکستان ترمنځ دغه ۱۶ ماده‌ییز دفاعي تړون د ۲۰۲۶ کال د اګست په اوومه په مکه مکرمه کې لاسلیک شوی و. د تړون له مخې، که پر یوه غړي هېواد وسله‌وال برید وشي، دا به د ټولو غړو پر وړاندې برید ګڼل کېږي او درې واړه هېوادونه به د ګډ دفاعي غبرګون په اړه همغږي کوي

د ترکیې د پارلمان د بهرنیو اړیکو کمېټې د اکتوبر په ۲۷مه دغه تړون تصویب کړی او د پارلمان عمومي غونډې ته یې د بحث او رایې اچونې لپاره استولی دی؛ خو د عمومي غونډې د پرېکړې کره نېټه نه وه اعلان شوې. د رویټرز د نومبر د څلورمې نېټې راپور بیا ویلي چې پارلمان د تړون د تصویب لپاره د رایې اچونې پلان درلود

د ترکیې حکومت ټینګار کوي چې دغه تړون دفاعي بڼه لري او د نورو هېوادونو پر ضد نه دی؛ همداراز، د ترکیې د پوځ د سرتېرو هر ډول بهرنی لېږد جلا پارلماني اجازې ته اړتیا لري