قاآني: له افغانستان تر یمن او غزې او لبنان پورې باید د دفاع کمربند پیاوړی شي

اشتراک گذاری:

د ایران د سپاه پاسداران د قدس ځواک قوماندان اسماعیل قاآني وايي، باید له افغانستانه تر یمن او له ایرانه تر غزې او لبنان پورې د «دفاع، خپلواکۍ غوښتنې او عزت کمربند» پیاوړی شي.

بریانیوز- جمعه، ١٠ میزان ١٤٠٥

ایراني رسنیو د جمعې په ورځ، د میزان په ۱۰مه، راپور ورکړی چې قاآني دا څرګندونې په تهران کې د «مقاومت جبهې» د وژل شویو قوماندانانو د دویمې تلین په مناسبت جوړې شوې غونډې کې کړې دي.

قاآني ادعا کړې چې په یمن کې د «مقاومت» ځواکونه او د لبنان حزب‌الله د خپلو مخالفانو پر وړاندې مقاومت او پرمختګ ته دوام ورکړی دی.

هغه د عراق څخه د امریکايي ځواکونو وتل هم «بریا» بللې او ویلي یې دي: «امریکا له ټولو امکاناتو سره سره له عراقه وایستل شوه او د ایران پر وړاندې له سپکوونکې ماتې سره مخ شوه.»

د سپاه پاسداران د قدس ځواک قوماندان همداراز ادعا کړې چې امریکا فکر کاوه کولای شي ایران په څلورو ورځو یا ډېره موده کې په دوو اوونیو کې تسلیمېدو ته اړ کړي، خو د نوموړي په وینا، پایله د واشنګټن د محاسبې خلاف وه.

دا څرګندونې داسې مهال کېږي چې امریکا د سپټمبر په ۳۰مه په عراق کې خپل له ۲۰ کلونو ډېر پوځي حضور پای ته ورساوه.

د امریکايي ځواکونو وتل له بغداد سره د واشنګټن د هغه توافق له مخې ترسره شوي چې په عراق کې د نړیوال ائتلاف د ماموریت د پای ته رسولو لپاره شوی و.