د پاکستان د هوايي بریدونو په اړه د هېوادونو چوپتیا؛ یوناما: ۱۰ ملکي وګړي وژل شوي

اشتراک گذاری:

د پاکستان له لوري د افغانستان پر کنړ او هلمند ولایتونو د هوايي بریدونو دوی ورځ وروسته، د دغو بریدونو په اړه د نړیوالو هېوادونو رسمي غبرګونونه لا هم نه دي څرګند شوي.

بریانیوز- جمعه، ١٠ میزان ١٤٠٥

د افغانستان لپاره د ملګرو ملتونو د مرستندویه پلاوي (یوناما) د معلوماتو له مخې، په دغو هوايي بریدونو کې لږ تر لږه ۱۰ ملکي وګړي وژل شوي او ۹ نور ټپیان شوي دي. یوناما ویلي چې د وژل شویو ډېری کسان ماشومان دي.

یوناما په خپل راپور کې د ملکي وګړو د مرګ‌ژوبلې په اړه اندېښنه څرګنده کړې او پر ټولو خواوو یې د تاوتریخوالي د کمولو، خبرو اترو، د نړیوال بشردوستانه قانون د درناوي او د ملکي وګړو د لا زیان د مخنیوي غوښتنه کړې ده.

د طالبانو حکومت د دغو بریدونو په غبرګون کې ویلي چې پاکستاني جنګي الوتکو د کنړ د شلتن ولسوالۍ او د هلمند د ګرمسېر ولسوالۍ پر استوګنیزو سیمو بریدونه کړي دي. د طالبانو حکومت دغه بریدونه «تجاوز او جنایت» بللي او په کلکه یې غندلي دي.

بلخوا، د پاکستان حکومت او پوځ ویلي چې دغه عملیات د «غضب للحق» په نوم د عملیاتو په چوکاټ کې او د استخباراتي معلوماتو پر بنسټ ترسره شوي دي. د پاکستان د چارواکو په وینا، په دغو عملیاتو کې ۲۲ «ترهګر» وژل شوي دي.

د پاکستان د ادعاوو او د طالبانو د حکومت د څرګندونو تر څنګ، یوناما د ملکي وګړو د مرګ‌ژوبلې په اړه خپل معلومات خپاره کړي، خو د دواړو لورو د ادعاوو په اړه یې د مسؤلیت د تثبیت پرېکړه نه ده کړې.