نصیر احمد اندېشه : د بشري حقونو شورا د ریچارډ بېنېټ ماموریت د یو بل کال لپاره وغځاوه

اشتراک گذاری:

(بریانیوز سه شنبه (۱۳/ میزان /۱۴۰۵هـ.ش

د افغانستان د جمهوري نظام د بهرنیو چارو وزارت سیاسي مرستیال نصیر احمد اندېشه د ملګرو ملتونو د بشري حقونو شورا په ۶۳مه غونډه کې د طالبانو پر تګلارو نیوکه کړې او د بشري حقونو د سرغړونو د اسنادو د خوندي ساتلو لپاره یې د یوه خپلواک نړیوال میکانیزم د جوړېدو غوښتنه کړې ده

اندېشه د طالبانو پر تګلارو د نیوکې پر مهال دغه ډلې ته د ښځو او نجونو پر وړاندې د تبعیضي سیاستونو د پلي کولو نسبت ورکړی او ویلي یې دي چې د بشري حقونو د سرغړونو د اسنادو ساتنه او مستندسازي باید دوام وکړي

د بشري حقونو شورا ۶۳مه غونډه د سپټمبر له ۷مې تر اکتوبر ۷مې په جنیوا کې روانه ده

د غونډې په ترڅ کې د افغانستان د بشري حقونو په اړه پرېکړه‌لیک هم تصویب شوی چې له مخې یې د افغانستان لپاره د ملګرو ملتونو د بشري حقونو د ځانګړي راپور ورکوونکي ریچارډ بېنېټ ماموریت د یو بل کال لپاره غځول شوی دی. د ملګرو ملتونو د بشري حقونو دفتر هم بېنېټ د افغانستان لپاره د ځانګړي راپور ورکوونکي په توګه ثبت کړی دی

په پرېکړه‌لیک کې د ښځو او نجونو د حقونو وضعیت ته ځانګړې پاملرنه شوې او د افغانستان د بشري حقونو د وضعیت د څار او مستندسازۍ پر دوام ټینګار شوی دی. د ځانګړي راپور ورکوونکي له مهمو مسوولیتونو څخه د بشري حقونو د سرغړونو او ناوړه ګټه اخیستنو اړوند معلومات راټولول او مستندول دي

ریچارډ بېنېټ له ۲۰۲۲ کال راهیسې د افغانستان لپاره د ملګرو ملتونو د بشري حقونو ځانګړی راپور ورکوونکی دی او د افغانستان د بشري حقونو د وضعیت په اړه د ملګرو ملتونو بشري حقونو شورا ته منظم راپورونه وړاندې کوي