یوسفزی: طالبان د نړیوال رسمیت ارزښت نه درک کوي، نړیوال تعامل ورته د ټوکې موضوع ښکاري

ازاد خبریال سمیع یوسفزي په خپله تازه لیکنه کې د افغانستان لپاره د نړیوال رسمیت، رسمي استازیتوب او په نړیوالو بنسټونو کې د مشارکت پر ارزښت ټینګار کړی دی.

بریانیوز- سه‌شنبه، ١٤ میزان ١٤٠٥

یوسفزي لیکلي، د مسکو له وروستي کنفرانس څخه د نړیوال رسمیت ارزښت ښه درک کېدای شي؛ ځکه د افغانستان او پاکستان ترمنځ د اختلاف له امله غونډه د ګډ وروستي بیان له تصویب پرته پای ته ورسېده. د نوموړي په باور، د اختلاف یوه مهمه برخه د افغانستان او ترهګرۍ په اړه د متن پر ژبه وه.

هغه زیاتوي، که افغانستان په ملګرو ملتونو او نورو نړیوالو سازمانونو کې بشپړ غړیتوب او رسمي استازیتوب درلودای، له پاکستان په څېر ګاونډیانو سره د اختلافونو پر مهال به یې د خپل موقف د مطرح کولو او دفاع لپاره ډېر پراخ رسمي او حقوقي فرصتونه لرل.

د یوسفزي په وینا، د طالبانو یوه اساسي ستونزه دا ده چې د نړیوال رسمیت، رسمي اړیکو او په نړیوالو بنسټونو کې د مشارکت عملي ارزښت یې لا هم په بشپړه توګه نه دی درک کړی او موضوع ته په سپکه سترګه ګوري. د هغه په باور، له همدې امله طالبان ډېر ځله داسې دریځونه نیسي چې د نړیوال تعامل ساحه یې لا محدوده کولی شي.

نوموړي همداراز لیکلي چې د پاکستان له نظره، د نړیوال رسمیت له نشتوالي او انزوا سره سره، د طالبانو نظام تر اوسه د دغه هېواد لپاره له اختلافونو او جنجالونو سره سره «تر ټولو غوره او بې‌بدیله» نظام بلل کېږي.

یوسفزي ټینګار کړی چې همدا واقعیت د دې لامل شوی چې ډېر افغانان د پاکستان او طالبانو ترمنځ اوسنیو شخړو ته د شک په سترګه وګوري، ځکه د ده په وینا، په دې شخړو کې د پاکستان اصلي هدف تر اوسه افغانان پاتې شوي دي.