اخبار جهان

سعودي عربستان : د سوریې ولسمشر ریاض ته تللی، له محمد بن سلمان سره یې وکتل

اشتراک گذاری:

(بریانیوز چهار شنبه (۱۵/ میزان /۱۴۰۵هـ.ش

د سوریې ولسمشر احمد الشرع د یوه رسمي سفر په ترڅ کې د سعودي عربستان پلازمېنې ریاض ته تللی او د دغه هېواد له ولیعهد او لومړي وزیر محمد بن سلمان سره یې لیدلي دي

الشرع د اکتوبر پر شپږمه ریاض ته ورسېد او د سوریې د بهرنیو چارو له وزیر اسعد الشیباني سره یو ځای یې سفر کړی و. د رسېدو پر مهال د ریاض سیمې والي فیصل بن بندر بن عبدالعزیز د نوموړي هرکلی وکړ

په لیدنه کې د سوریې او سعودي عربستان د دوه اړخیزو اړیکو، د همکاریو د پراختیا او د سیمې د وروستیو بدلونونو په اړه خبرې وشوې. دواړو لوریو د ګډو همکاریو او د سیمې د امنیت او ثبات اړوند موضوعاتو په اړه هم د نظرونو تبادله کړې ده

د سوریې او سعودي عربستان اړیکې د بشار الاسد د واکمنۍ پر مهال له سیاسي ترینګلتیا سره مخ وې، خو د هغه له واکه له لرې کېدو وروسته د دواړو هېوادونو ترمنځ اړیکو او تماسونو کې د پراختیا هڅې شوې دي

د الشرع او محمد بن سلمان دا لیدنه په داسې مهال کېږي چې د دواړو هېوادونو ترمنځ د سیاسي او اقتصادي همکاریو د پراختیا لپاره اړیکې دوام لري. د سوریې ولسمشر تر دې مخکې هم د اپرېل په میاشت کې په جده کې له سعودي ولیعهد سره لیدلي وو

د سوریې د ولسمشرۍ د معلوماتو له مخې، په وروستۍ لیدنه کې د سوریې د بیارغونې، پانګونې او د دواړو هېوادونو ترمنځ د اقتصادي همکاریو موضوعات هم مطرح شوي دي. الشرع محمد بن سلمان ته سوریې ته د سفر رسمي بلنه هم ورکړې ده