اخبار جهان

د کاناډا لومړی وزیر : مارک کارني د اکتوبر له ۲۱ تر ۲۳ ترکیې ته سفر کوي

اشتراک گذاری:

(بریانیوز چهار شنبه (۱۵/ میزان /۱۴۰۵هـ.ش

د کاناډا لومړی وزیر مارک کارني ټاکل شوې د اکتوبر له ۲۱ تر ۲۳ پورې ترکیې ته سفر وکړي. دا به د کاناډا د یوه لومړي وزیر له لوري ترکیې ته د لومړي ځانګړي دوه‌اړخیز رسمي سفر په توګه ثبت شي

کارني به د سفر پر مهال په انقره کې د ترکیې له ولسمشر رجب طیب اردوغان سره وګوري او د دواړو هېوادونو ترمنځ د انرژۍ، کانونو، دفاع، امنیت او اقلیمي همکاریو د پراختیا په اړه خبرې وکړي

د کاناډا د لومړي وزیر دفتر ویلي، کارني به په استانبول کې له ترکي سوداګرو او پانګه‌والو سره هم وګوري او د سوداګرۍ او پانګونې لپاره به د کاناډا د فرصتونو په اړه خبرې وکړي. په ځانګړي ډول د انرژۍ، هوايي صنعت، پرمختللو ټکنالوژیو او مهمو کانونو په برخو کې د همکاریو پر پراختیا ټینګار کېږي

دواړو هېوادونو د روان کال په جولای کې د ناټو د سرمشریزې په څنډه کې د یوه هر اړخیزه ازادې سوداګرۍ تړون پر لور د رسمي خبرو د پیل اعلان کړی و. د کاناډا د حکومت په وینا، د دواړو هېوادونو ترمنځ سوداګري په تېرو پنځو کلونو کې نږدې ۵۰ سلنه زیاته شوې او په ۲۰۲۵ کال کې د دواړو لوریو د توکو سوداګرۍ ارزښت شاوخوا ۴.۳ میلیارد کاناډايي ډالرو ته رسېدلی و

د کارني د ترکیې سفر په داسې وخت کې ترسره کېږي چې کاناډا هڅه کوي له متحده ایالاتو پرته له نورو هېوادونو سره خپلې سوداګریزې او اقتصادي اړیکې پراخې کړي