نيويارک:ټرمپ د ایران جګړې د پای ته رسولو په اړه د قطر له لومړي وزیر سره ګوري

نيويارک:ټرمپ د ایران جګړې د پای ته رسولو په اړه د قطر له لومړي وزیر سره ګوري

(بریانیو دوشنبه (۱۸/ عـقـرب/۱۴۰۵هـ.ش

د امریکا ولسمشر ډونالډ ټرمپ به نن  د دوشنبې په ورځ په سپینه ماڼۍ کې د قطر له لومړي وزیر او بهرنیو چارو وزیر، شیخ محمد بن عبدالرحمن آل ثاني، سره وګوري. تمه ده چې دواړه مشران د ایران د جګړې د پای ته رسولو لپاره پر روانو ډیپلوماټیکو هڅو او د اختلافونو د هواري پر لارو چارو خبرې وکړي

دا لیدنه په داسې وخت کې ترسره کېږي چې د ایران د جګړې د پای ته رسولو په موخه ډیپلوماټیکې هڅې له ګڼو خنډونو سره مخ دي. قطر هڅه کوي د منځګړیتوب له لارې د ایران د اټومي پروګرام په اړه د اختلافونو د کمولو او د جګړې د پای ته رسولو لپاره د یوې هوکړې پر شرایطو د دواړو لورو ترمنځ تفاهم رامنځته کړي

په همدې حال کې، د امریکا د بهرنیو چارو وزیر مارکو روبیو ویلي چې له ایران سره په خبرو اترو کې د پام وړ پرمختګ نه دی شوی او تمه نه لري چې په نږدې راتلونکي کې به کومه مهمه هوکړه ترلاسه شي

بلخوا، ټرمپ ویلي، که د خبرو اترو په پایله کې له ایران سره یوه پیاوړې او د منلو وړ هوکړه وشي، نو پر دغه هېواد د نویو بریدونو احتمال به ډېر کم وي

خو نوموړي خبرداری ورکړی چې که پوځي عملیات بیا پیل شي، امریکا په ایران کې د زیربناوو ځینې نور هدفونه هم په نښه کولو ته په پام کې نیولي دي

د قطر د لومړي وزیر او د امریکا د ولسمشر دا لیدنه داسې مهال کېږي چې د جګړې د پای ته رسولو لپاره د ډیپلوماټیکو هڅو ترڅنګ د پوځي اقداماتو احتمال هم لا له منځه نه دی تللی