د کابل پوهنتون د طالبانو له لوري تر راتلونکې پنجشنبې پورې رخصت شو

اشتراک گذاری:

د کابل پوهنتون د طالبانو تر ادارې لاندې مسوولینو اعلان کړی چې دغه پوهنتون به له سبا یکشنبې څخه د راتلونکې پنجشنبې تر ورځې پورې تړلی وي.

بریانیوز- شنبه، ٢٣ عقرب ١٤٠٥

د کابل پوهنتون په هغه خبرتیا کې چې نن (شنبه، د لړم ۲۳مه) خپره شوې، ویل شوي چې د لیسانس (ورځنۍ او شپنۍ) او د ماسټرۍ دورې درسونه د یکشنبې څخه تر پنجشنبې پورې رخصت دي.

د پوهنتون د رخصتۍ لامل په رسمي خبرتیا کې نه دی روښانه شوی؛ خو یو شمېر محصلین اټکل کوي چې ښايي په دې موده کې د کابل پوهنتون دننه یوه مهمه غونډه ترسره شي.

دا په داسې حال کې ده چې د سرچینو په وینا، طالبانو شاوخوا دوه اوونۍ وړاندې د کابل پوهنتون له لیلیې څخه محصلین ایستلي او پر ځای یې د خپلو پلویانو ملا امامان ځای پر ځای کړي دي.

ویل کېږي چې دغه ملا امامان په کابل کې د طالبانو په یوه غونډه کې د ګډون لپاره راغوښتل شوي دي. ځینو محصلینو ویلي چې دوی ته ویل شوي چې د طالبانو مشر کابل ته راځي.

تر اوسه د طالبانو چارواکو د کابل پوهنتون له لیلیې څخه د محصلینو د ایستلو او د پوهنتون د رخصتۍ په اړه رسمي وضاحت نه دی ورکړی.