هند د طالبانو او پاکستان د نښتو په تړاو د اسلام‌اباد تورونه رد کړل

هند د طالبانو او پاکستان د نښتو په تړاو د اسلام‌اباد تورونه رد کړل

بریانیوز:(جمعه ،۲۲ حوت۱۴۰۴)

د هند د بهرنيو چارو وزارت وياند رندهیر جیسوال د پاکستان هغه ادعاوې رد کړې چې ګواکې نوې ډيلي د طالبانو او پاکستان تر منځ د وروستيو نښتو په زياتېدو کې لاس لري

جیسوال په خپلو تازه څرګندونو کې وويل چې د اسلام‌اباد دا تورونه «بې‌اساس» دي او هېڅ حقيقت نه لري. هغه ټينګار وکړ

چې هند د افغانستان د ثبات، سولې او پرمختګ ملاتړ کوي او د سيمې د کړکېچونو د زياتېدو هېڅ ډول ګټه نه ويني

د هند د بهرنيو چارو وزارت وياند زياته کړه چې د افغانستان وضعيت يو حساس او مهم موضوع ده او بايد د سيمې ټول هېوادونه هڅه وکړي چې د تاوتريخوالي د زياتېدو پر ځای د سولې او همکارۍ لارې غوره کړي

دا څرګندونې وروسته له هغې کېږي چې د پاکستان يو شمېر چارواکو ادعا کړې وه چې هند د افغانستان له خاورې څخه د هغو ډلو ملاتړ کوي چې د پاکستان پر ضد فعاليت کوي او د وروستيو امنيتي پېښو تر شا لاس لري

خو د هند چارواکي وايي چې دا ډول تورونه يوازې سياسي بڼه لري او د سيمه‌ييزو ستونزو د پټولو لپاره کارول کېږي. جیسوال وويل چې هند د افغانستان له خلکو سره د بشري مرستو، پرمختيايي پروژو او اقتصادي همکاريو له لارې مرسته کوي

په دې وروستيو مياشتو کې د اسلامي امارت طالبان ځواکونو او پاکستاني پوځ تر منځ د سرحدي سيمو په ځينو برخو کې نښتې راپور شوې دي. دغو پېښو د دواړو هېوادونو تر منځ اندېښنې زياتې کړې او د سيمې د امنيت په اړه پوښتنې راپورته کړې دي

شنونکي باور لري چې د افغانستان، پاکستان او هند تر منځ سياسي رقابتونه تل د سيمې پر امنيتي وضعيت اغېز لري، خو د کړکېچونو د حل لپاره د خبرو اترو او ډيپلوماتيکو لارو کارول د سيمې د ثبات لپاره مهم بلل کېږي