د پاکستان لومړی وزير سعودي عربستان ته ځي؛ د سيمې پر کړکېچ او امنيتي وضعيت به خبرې وکړي

د پاکستان لومړی وزير سعودي عربستان ته ځي؛ د سيمې پر کړکېچ او امنيتي وضعيت به خبرې وکړي

بریانیوز:(جمعه ،۲۲ حوت۱۴۰۴)

 د پاکستان د لومړي وزير دفتر اعلان کړی چې د پاکستان لومړی وزير به ډېر ژر سعودي عربستان ته سفر وکړي او هلته به د سعودي له وليعهد سره د سيمې د روانو حالاتو او دوه اړخيزو اړيکو په اړه خبرې وکړي

د ياد دفتر د معلوماتو له مخې، ټاکل شوې ده چې د پاکستان لومړی وزير د سعودي له وليعهد محمد بن سلمان سره وګوري. په دې کتنه کې به دواړه مشران د منځني ختيځ پر روان کړکېچ، امنيتي وضعيت او د دواړو هېوادونو تر منځ پر سياسي او اقتصادي اړيکو مفصلې خبرې وکړي

دغه سفر په داسې حال کې ترسره کېږي چې په ایران کې د وروستيو پوځي پېښو او کړکېچونو له امله د منځني ختيځ امنيتي وضعيت ډېر حساس شوی دی. ايران ويلي چې د امریکا متحده ایالات او اسرائيل د بريدونو په غچ کې يې په سيمه کې پر "امريکايي هدفونو" بريدونه پيل کړي دي

د راپورونو له مخې، ايران ادعا کړې چې دا بريدونه يوازې د يو هېواد پر ضد نه دي، بلکې په سيمه کې د امريکا له پوځي حضور او اډو سره تړلي هدفونه په نښه کوي. ويل کېږي چې د دغو بريدونو له امله د منځني ختيځ په يو شمېر هېوادونو کې د امنيتي اندېښنو کچه لوړه شوې ده

شنونکي باور لري چې د پاکستان د لومړي وزير دا سفر ښايي د سيمې د کړکېچ د ارزونې او د مهمو اسلامي هېوادونو تر منځ د سلا مشورو د زياتولو لپاره ترسره کېږي، ځکه چې پاکستان او سعودي عربستان له اوږدې مودې راهيسې نږدې سياسي، اقتصادي او امنيتي اړيکې لري

د سياسي چارو کارپوهان وايي چې د منځني ختيځ وروستۍ پېښې نه يوازې د سيمې پر امنيت اغېز کولی شي، بلکې د نړيوال اقتصاد او انرژۍ پر بازارونو هم اغېز لري

د ايران د روان وضعيت، د سيمې د پوځي تحرکاتو او اړوندو نورو خبرونو په اړه نور معلومات د بي بي سي پښتو وېبپاڼې په ځانګړې ژوندۍ پاڼه کې لوستل کېدای شي