د ایران جګړه او نوې لارې: تاتارستان، ترکمنستان او افغانستان د بدیل ټرانزیټي دهلېز پر جوړولو هوکړه وکړه

اشتراک گذاری:

بریانیوز:(جمعه،۱۴حمل۱۴۰۵)

د ایران د روانې جګړې او سیمه‌ییزو ستونزو په رڼا کې، تاتارستان، ترکمنستان او افغانستان د یو نوي ټرانزیټي دهلېز پر جوړولو هوکړه کړې چې د ایران له لارې پرته به د سوداګرۍ او ترانزیټ لپاره بدیله لاره برابره کړي

د راپورونو له مخې، دا نوې لاره به د سیمې هېوادونو ته دا امکان ورکړي چې خپل سوداګریز توکي له ایران پرته نورو بازارونو ته ورسوي او د ټرانزیټ پر دودیزو لارو د تکیې کچه راکمه کړي. ویل کېږي چې د دې دهلېز هدف د سیمه‌ ییزو اړیکو پیاوړتیا او د سوداګرۍ اسانتیا ده

چارواکي وایي، د دې پروژې له عملي کېدو سره به د توکو د لېږد بهیر چټک شي او د سوداګرۍ لګښتونه به راکم شي. همدارنګه به دا لاره د منځنۍ اسیا او جنوبي اسیا ترمنځ د اړیکو په پیاوړتیا کې مهم رول ولوبوي

شنونکي باور لري چې دا نوښت د ایران د جګړې له امله رامنځته شویو ستونزو ته یو بدیل حل دی، ځکه د سیمې هېوادونه هڅه کوي چې د ناامنۍ او سیاسي خطرونو اغېز کم کړي

په همدې حال کې، تمه کېږي چې د دې ټرانزیټي دهلېز په اړه نور تخنیکي جزییات او د عملي کېدو مهالویش به په راتلونکو میاشتو کې روښانه شي، خو کارپوهان وایي چې که دا پروژه بریالۍ شي، نو د سیمې د اقتصادي اړیکو په نقشه کې به مهم بدلون راولي