برني سنډرز: له افغان متحدینو سره د امریکا چلند “ظالمانه او غیر اخلاقي” دی

برني سنډرز: له افغان متحدینو سره د امریکا چلند “ظالمانه او غیر اخلاقي” دی

بریانیوز:( شنبه،۵ ثور۱۴۰۵)

واشنګټن – امریکایي سناتور برني سنډرز د ډانلډ ټرمپ د حکومت پر تګلارو سختې نیوکې کړې او ویلي یې دي چې امریکا باید له هغو افغانانو سره خیانت ونه کړي چې د جګړې پر مهال یې د امریکایي ځواکونو ترڅنګ خپل ژوند له جدي ګواښ سره مخ کړی و

سنډرز هغه پرېکړه “ظالمانه او غیر اخلاقي” بللې چې له مخې یې په قطر کې مېشت افغانان دې یا کانګو ته ولېږدول شي او یا دې بېرته افغانستان ته ستانه کړل شي. نوموړي ټینګار کړی چې دغه ډول چلند نه یوازې له بشري ارزښتونو سره په ټکر کې دی، بلکې د امریکا د نړیوال اعتبار لپاره هم زیانمن تمامېږي

دغه افغانان، چې د ۲۰۲۱ کال د افغانستان سیاسي بدلون وروسته د امریکا له لوري قطر ته انتقال شوي، په یوه ګډ لیک کې ویلي چې نه غواړي کانګو ته ولاړ شي. د دوی په وینا، کانګو خپله له امنیتي ستونزو او جګړو سره مخ دی او هلته تګ به د دوی ژوند له نوو خطرونو سره مخ کړي

شنونکي باور لري چې د افغان پخوانیو همکارانو موضوع یو ځل بیا د امریکا په کورني سیاست کې د بحث وړ ګرځېدلې ده. د دوی په اند، د دغو کسانو راتلونکی برخلیک نه یوازې یو بشري مسوولیت دی، بلکې د امریکا د پخوانیو ژمنو د اعتبار ازموینه هم ګڼل کېږي

په ورته وخت کې، د بشري حقونو فعالان له واشنګټن څخه غواړي چې د دې افغانانو لپاره خوندي او دایمي حل‌لار ومومي، څو هغوی د ناڅرګند برخلیک او احتمالي خطرونو څخه وژغورل شي