قابلو پانګونه؛ د میندو او نويو زېږېدلو ژوند ژغورلو تر ټولو اغېزمنه لاره

اشتراک گذاری:

بریانیوز| سه‌شنبه، ۱۵ ثور ۱۴۰۵

د ملګرو ملتونو د وګړو صندوق ویلي چې په افغانستان کې په قابلو پراخه پانګونه کولای شي د میندو او نويو زېږېدلو ماشومانو د ژوند ژغورلو لپاره تر ټولو اغېزمنه او ګټوره لاره وي

یاد بنسټ په خپله وروستۍ څرګندونه کې ټینګار کړی چې که د قابلو شمېر زیات شي او پر هغوی لازمې اسانتیاوې برابرې شي، نو د امیندوارۍ پر مهال د روغتیايي خدمتونو کچه لوړېږي او ښځې کولای شي خوندي او مسلکي پاملرنه ترلاسه کړي

د دغه سازمان په وینا، قابله‌ګانې نه یوازې د زېږون پر مهال مهم رول لري، بلکې د زېږون مخکې او وروسته پاملرنې کې هم بنسټیز اهمیت لري. دا چاره د دې لامل کېږي چې د مور او ماشوم د مړینې خطر په پام وړ ډول راکم شي

د ملګرو ملتونو د وګړو صندوق زیاتوي چې د قابلو ملاتړ او روزنه د روغتیايي سیستم د پیاوړتیا یوه مهمه برخه ده، ځکه دا کار د ښځو لاسرسی اساسي خدماتو ته اسانه کوي او په ځانګړي ډول په لرو پرتو سیمو کې د ژوند ژغورنې فرصتونه زیاتوي

کارپوهان هم باور لري چې په قابلو پانګونه نه یوازې د انساني ژوند د ژغورلو سبب کېږي، بلکې د یوې سالمې او باثباته ټولنې د جوړېدو لپاره هم حیاتي ارزښت لري