مقاله

تهران واشنګټن ته توند پیغام: د یورانیمو سپارل د هوکړې دروازې تړي

اشتراک گذاری:

بریا نیوز (شنبه ،۲جوزا، ۱۴۰۵)

د ایران د بهرنیو چارو وزارت ویاند اسماعیل بقایي خبرداری ورکړی، که امریکا د ایران د غني شویو یورانیمو د زېرمو د سپارلو غوښتنه وکړي، نو د تهران او واشنګټن ترمنځ هر ډول احتمالي هوکړه به له ناکامۍ سره مخ شي

بقایي ویلي، د ایران اتومي پروګرام د هېواد مشروع حق دی او تهران به هېڅکله داسې شرطونه ونه مني چې د هېواد ملي ګټې او خپلواک دریځ زیانمن کړي. نوموړي ټینګار کړی چې خبرې اترې باید د متقابل درناوي او باور جوړونې پر بنسټ ولاړې وي، نه د فشار او ګواښ پر تګلارې

هغه زیاته کړې، ایران د سوله‌ییز اتومي پروګرام ملاتړ کوي او د خپلو علمي، انرژۍ او روغتیايي اړتیاوو لپاره به خپلو اتومي فعالیتونو ته دوام ورکړي

بلخوا سیاسي شنونکي وایي، د غني شویو یورانیمو موضوع د ایران او امریکا ترمنځ د اختلاف تر ټولو حساسې او لانجمنې برخې څخه ده. د دوی په باور، واشنګټن هڅه کوي د تهران اتومي وړتیاوې محدودې کړي، خو ایران بیا دا غوښتنې د خپل ملي حاکمیت پر ضد بولي

کارپوهان باور لري چې د دواړو هېوادونو ترمنځ ژور بې‌باوري، سیاسي فشارونه او د اتومي پروګرام پر سر سخت اختلافونه لا هم د هر ډول نوې هوکړې پر وړاندې ستر خنډونه ګڼل کېږي