مقاله

روسیه: په ۱۳ ساعتونو کې مو د اوکراین ۳۳۹ بې‌ پیلوټه الوتکې نسکورې کړې

اشتراک گذاری:

روسیه: په ۱۳ ساعتونو کې مو د اوکراین ۳۳۹ بې‌پیلوټه الوتکې نسکورې کړې

بریانیوز- یکشنبه، ١۷ جوزا ١٤٠٥

د روسیې دفاع وزارت ویلي چې د شنبې په ورځ یې یوازې د ۱۳ ساعتونو په موده کې د اوکراین ۳۳۹ بې‌ پیلوټه الوتکې شنډې او نسکورې کړې دي

د وزارت په وینا، دغه الوتکې د مسکو په ګډون د روسیې په ۱۳ بېلابېلو سیمو او ښارونو کې کشف او له منځه وړل شوې دي. روسي چارواکي وایي د هوايي دفاعي ځواکونو چټک غبرګون د دې لامل شو چې د بریدونو احتمالي زیانونه محدود پاتې شي

د د راپور له مخې، د دغو بریدونو او امنیتي تدابیرو له امله د شنبې په ورځ د روسیې په یو شمېر هوايي ډګرونو کې الوتنې په لنډمهالي ډول ځنډول شوې او د مسافرو د خوندیتوب لپاره ځانګړي اقدامات ترسره شوي دي

روسي چارواکو تر اوسه د احتمالي تلفاتو او مالي زیانونو په اړه بشپړ معلومات نه دي ورکړي، خو ټینګار یې کړی چې د هېواد هوايي دفاعي سیستمونو د ډرونونو ډېره برخه تر هدف ته رسېدو وړاندې له منځه وړې ده

شنونکي باور لري چې د روسیې او اوکراین ترمنځ د جګړې له اوږدېدو سره د بې‌پیلوټه الوتکو کارونه د دواړو لورو په پوځي تګلارو کې مهم ځای خپل کړی او د جګړې جغرافیه یې له لومړۍ کرښې ور هاخوا نورو سیمو ته هم غځولې ده

دا پېښه په داسې وخت کې رامنځته کېږي چې د مسکو او کیف ترمنځ جګړه لا هم روانه ده او دواړه لوري د پوځي فشار د زیاتولو لپاره له نوې ټکنالوژۍ او بې‌پیلوټه الوتکو پراخه ګټه اخلي