مقاله

راپور: په هلمند کې د پخواني ملي راډیو ټلوېزیون فعالیتونه درېدلي

اشتراک گذاری:

په هلمند کې د پخواني ملي راډیو ټلوېزیون فعالیتونه درېدلي

بریانیوز- یکشنبه، ١۷ جوزا ١٤٠٥

د هلمند ولایت د پخواني ملي راډیو ټلوېزیون د ودانۍ او تجهیزاتو په اړه خپاره شوي معلومات ښيي چې د دغه رسنیز مرکز تلویزیوني فعالیتونه درېدلي او د ودانۍ ځینې برخې له دوړو او خاورې ډکې شوې دي

د بریا نیوز د راپور له مخې، یوه کارکوونکي چې نه یې غوښتل نوم یې خپور شي، ویلي چې د ادارې نوم بدل شوی او د امر بالمعروف قانون له مخې د انځورونو او ویډیويي خپرونو د محدودیتونو له امله د تلویزیون نشرات بند شوي دي

د سرچینې په وینا، د ټلوېزیون سټوډیوګانې له اوږدې مودې راهیسې نه دي کارول شوې او یو شمېر تخنیکي وسایل او تجهیزات هم له خپلو پخوانیو ځایونو لېرې شوي دي

تر اوسه د یادو ادعاوو په اړه د هلمند د اړوندو مسئولینو یا د اسلامي امارت د رسنیو د ادارو له لوري رسمي وضاحت نه دی خپور شوی

د رسنیو د چارو څارونکي وایي چې سیمه‌ییزې رسنۍ د معلوماتو د رسولو، عامه پوهاوي او ټولنیزو موضوعاتو د انعکاس مهم رول لري، او د هغوی د فعالیتونو هر ډول محدودېدل د اطلاعاتو پر لاسرسي اغېز کولی شي

دا راپور په داسې وخت کې خپرېږي چې د افغانستان په بېلابېلو ولایتونو کې د رسنیو د فعالیتونو، نشراتي تګلارو او د اطلاعاتو د خپرولو د څرنګوالي په اړه بحثونه دوام لري