سیاست

ایرلینډ: په افغانستان کې له جنسي تاوتریخوالي د ښځو د حقونو د محدودولو لپاره کار اخیستل کېږي

اشتراک گذاری:

بریانیوز شنبه - ۲۰ سرطان ١٤٠٥

نیویارک – د ایرلنډ د عدلیې وزیر جیم اوکالاهان د ملګرو ملتونو د امنیت شورا په غونډه کې ویلي چې په افغانستان کې له جنسي تاوتریخوالي څخه د ښځو او نجونو د حقونو او ازادیو د محدودولو لپاره د یوې وسیلې په توګه کار اخیستل کېږي

اوکالاهان ویلي، د ښځو او نجونو پر وړاندې تاوتریخوالی یوازې فردي ستونزه نه ده، بلکې په ځینو مواردو کې د فشار او کنټرول لپاره د یوې منظمې وسیلې په توګه هم کارول کېږي. هغه ټینګار کړی چې د افغان ښځو او نجونو وضعیت د نړیوالې ټولنې جدي پاملرنې ته اړتیا لري

دا څرګندونې په داسې حال کې کېږي چې د بشري حقونو یو شمېر بنسټونه وایي، طالبانو په تېرو څو کلونو کې د افغان ښځو او نجونو د زده کړو، کار او ټولنیز حضور په برخه کې ګڼ محدودیتونه لګولي دي

د بشري حقونو فعالان ادعا کوي چې د دغو محدودیتونو شمېر لسګونو ته رسېږي او د ښځو پر وړاندې د پراخو بندیزونو له امله یې د «جنسیتي اپارتاید» اصطلاح کارولې ده

ملګرو ملتونو او د بشري حقونو نړیوالو ادارو له افغان چارواکو غوښتي چې د ښځو او نجونو د حقونو درناوی وکړي او د زده کړو، کار او ټولنیز ژوند په برخو کې پرې لګول شوي محدودیتونه لرې کړي