مقاله

پاکستان: د افغانانو لپاره د جعلي پېژندپاڼو د برابرولو په تور یې څلور تنه نیولي

اشتراک گذاری:

بریانیوز- پنجشنبه، ۱- اسـد ١٤٠٥

پاکستان د پلټنو ادارې ادعا کړې چې په کراچۍ ښار کې یې د افغانانو لپاره د جعلي پېژندپاڼو د برابرولو په تور د ملي ثبت ادارې څلور تنه نیولي دي

د دغې ادارې د ویاند په وینا، نیول شویو کسانو کې د ملي ثبت ادارې یو مرستیال مشر، یو مرستیال کارکوونکی، یو ساتونکی او یو بل کس شامل دي. د ادارې په ادعا، دغو کسانو افغانانو ته د جعلي پېژندپاڼو په برابرولو، د رسمي مالوماتو په بدلولو او نورو ناقانونه چارو کې همکاري کوله

پاکستاني چارواکي وایي، د دې پېښې په اړه پلټنې روانې دي او که نور کسان هم په دې لړۍ کې ښکېل وموندل شي، قانوني چلند به ورسره وشي

خو تر اوسه پاکستان د خپلو ادعاوو د ثابتولو لپاره هېڅ ډول کره اسناد او شواهد نه دي خپاره کړي. همدارنګه، نیول شویو کسانو او یا هم د هغوی استازو د دغو ادعاوو په اړه تر اوسه کوم غبرګون نه دی څرګند کړی

دا ادعاوې په داسې وخت کې کېږي چې په پاکستان کې د افغان کډوالو او د هغوی د هویتي اسنادو په اړه د څارنې او نیونو لړۍ لا هم روانه ده